पुणे: पुणे जिल्ह्यातील दौंड तालुक्यात राहणाऱ्या शेतकरी आणि व्यापारी वर्गासाठी एक अतिशय आनंदाची बातमी समोर आली आहे. राज्य शासनाने दौंडमधील केडगाव येथील गट क्रमांक 117/1अ मधील तब्बल 20 एकर शासकीय गायरान जमीन, दौंड कृषी उत्पन्न बाजार समितीला विस्तारित मार्केटयार्ड बनवण्यासाठी केवळ 1 रुपया या नाममात्र शुल्कात देण्यास अधिकृत मंजुरी दिली आहे. यासंदर्भातील महसूल विभागाचा महत्त्वाचा आदेश नुकताच जाहीर झाला आहे.
केडगाव परिसराचा वाढता विस्तार पाहता येथे एक आधुनिक व स्वतंत्र कृषी बाजार आवार असणे अत्यंत गरजेचे होते. यापूर्वी माजी आमदार सुभाष कुल यांच्या पाठपुराव्यामुळे येथे 10 एकर जागा मंजूर झाली होती. आता आमदार राहुल कुल यांनी या विस्तारित मार्केटयार्डसाठी सातत्याने पाठपुरावा केला, ज्याला आता मोठे यश मिळाले आहे. या ऐतिहासिक निर्णयामुळे दौंड तालुक्यातील शेतकऱ्यांना आपल्या शेतमालाची विक्री करण्यासाठी हक्काची आणि सोयीस्कर जागा मिळणार असून बळीराजाला मोठा दिलासा लाभणार आहे.
केडगाव येथे नवीन बाजार आवार तयार झाल्यामुळे स्थानिक स्तरावर रोजगाराचे अनेक नवे मार्ग खुले होणार आहेत तसेच शेतीमालाच्या व्यापाराला मोठी चालना मिळणार आहे. हा महत्त्वपूर्ण निर्णय घेतल्याबद्दल आमदार राहुल कुल यांनी दौंड तालुक्यातील सर्व शेतकरी, बाजार समितीचे अधिकारी, पदाधिकारी व नागरिकांच्या वतीने राज्याचे मुख्यमंत्री देवेंद्र फडणवीस आणि महसूलमंत्री चंद्रशेखर बावणकुळे यांचे मनापासून आभार मानले आहेत.
