पुणे: रोहित्रांमधून तांब्याच्या तारा चोरीच्या वाढत्या घटनांमुळे नागरिकांमध्ये चिंता वाढली असतानाच लोणीकंद पोलिसांनी मोठी कामगिरी करत दोन आरोपींना अटक केली असून, त्यांच्याकडून 300 किलो तांब्याच्या तारांचा साठा जप्त करण्यात आला आहे. या कारवाईमुळे पाच गुन्ह्यांचा उलगडा झाला आहे.
पोलिसांनी दिलेल्या माहितीनुसार, गुप्त माहितीच्या आधारे कोंढापुरी चौक (ता. शिरूर) येथे सापळा रचण्यात आला. यावेळी भंगार व्यवसाय करणारा मैनुद्दीन सल्लाउद्दीन खान (वय 36) याला ताब्यात घेण्यात आले. अधिक चौकशी केली असता, त्याने साथीदार फिरोज मतीउल्लाह अहमद (वय 33) याच्यासह मिळून न्हावी सांडस, राहु रोड, पिंपरी सांडस, आष्टापुर, कोलवडी या परिसरातील रोहित्रांमधून रात्रीच्या वेळी तांब्याच्या तारा चोरल्याची कबुली दिली.
पोलिसांनी या आरोपींकडून सुमारे 300 किलो तांब्याचा मुद्देमाल जप्त केला आहे. चोरीची मालमत्ता भंगारामध्ये विक्रीसाठी आणली जात असल्याची माहितीही पुढे आली आहे.
ही कारवाई अपर पोलीस आयुक्त मनोज पाटील, पोलीस उपआयुक्त सोमय मुंडे आणि सहायक पोलीस आयुक्त प्रांजली सोनवणे यांच्या मार्गदर्शनाखाली, वरिष्ठ पोलीस निरीक्षक सर्जेराव कुंभार, पोलीस उपनिरीक्षक अर्जुन बेंदगुडे आणि त्यांच्या पथकातील कैलास साळुंके, सागर जगताप, स्वप्निल जाधव, संतोष अंदुरे, मल्हारी सपुरे, शुभम चिनके, शिवले, किरण पलांडे आणि अमोल ढोणे यांनी केली.
