अमित मुंडीक
पुणे: पुणे ग्रामीण पोलिसांच्या स्थानिक गुन्हे शाखा (Pune Crime) आणि आळेफाटा पोलीस स्टेशनच्या (Pune News) संयुक्त कारवाईत घरफोडी चोरी करणाऱ्या आंतरजिल्हा टोळीतील दोघांना अटक करण्यात आली आहे. या कारवाईत पोलिसांनी पाच गुन्हे उघडकीस आणून सुमारे 8 लाख 50 हजार रुपये किमतीचा मुद्देमाल जप्त केला आहे. मोहन भिकाजी भोसले (वय 20) आणि किशोर हापूस भोसले (वय 20, दोघे रा. कासाटी, ता. आष्टी, जि. बीड) अशी अटक करण्यात आलेल्या आरोपींची नावे आहेत.
आळेफाटा पोलीस स्टेशन गु.र.नं. 277/2025 अन्वये विक्रम महादू डेरे यांच्या घरफोडी प्रकरणात तपास सुरू असताना आरोपींचा मागोवा पोलिसांनी घेतला. फिर्यादी काही दिवस बाहेरगावी गेल्याने आरोपींनी त्यांच्या घराचे कुलूप तोडून घरातील कपाटातून साडेतीन तोळ्यांचे सोन्याचे दागिने चोरी केल्याची फिर्याद होती.
सणासुदीच्या काळात जुन्नर व खेड उपविभागात वाढलेल्या घरफोडीच्या घटनांवर नियंत्रण आणण्यासाठी ग्रामीण पोलिसांनी विशेष मोहीम राबवली होती. घटनास्थळावरील सीसीटीव्ही फुटेज तपासून संशयित यूनिकॉर्न मोटारसायकलचा शोध घेण्यात आला. गोपनीय माहितीच्या आधारे पोलिसांनी सापळा रचून दोन्ही आरोपींना आळेफाटा परिसरातून अटक केली. सखोल चौकशीत आरोपींनी आळेफाटा, नारायणगाव आणि मंचर पोलीस ठाण्याच्या हद्दीत पाच घरफोडी गुन्हे केल्याचे कबूल केले आहे.
आरोपींकडून 7 तोळे वजनाचे सोन्याचे दागिने, 180 ग्रॅम वजनाचा चांदीचा मुकुट, रोख रक्कम आणि यूनिकॉर्न मोटारसायकल – एकूण किंमत अंदाजे 8,50,000 रुपये असा सर्व मुद्देमाल जप्त करण्यात आला आहे. दोन्ही आरोपींना न्यायालयीन कोठडीत ठेवण्यात आले असून पुढील तपास सुरू आहे.
ही कारवाई मा. पोलीस अधीक्षक संदीप सिंह गिल्ल (पुणे ग्रामीण) यांच्या मार्गदर्शनाखाली, अपर पोलीस अधीक्षक रमेश चोपडे, उपविभागीय पोलीस अधिकारी धनंजय पाटील (जुन्नर विभाग) व अमोल मांडवे (खेड विभाग) यांच्या देखरेखीखाली करण्यात आली.
स्थानिक गुन्हे शाखेचे पो.नि. अविनाश शिळीमकर, आळेफाटा पो.नि. विश्वास जाधव, मंचर पो.नि. श्रीकांत कंकाळ, नारायणगाव पो.ठा.चे सपोनि. प्रविण सांगे, तसेच महोदय शेलार, अमित सिदपाटील, विक्रम तापकीर, दिपक साबळे, हेमंत विरोळे, संदिप वारे, अक्षय नवले, निलेश सुपेकर, सतिश टाव्हरे, अमित म्हाळुंजे, विनोद गायकवाड, पंकज पारखे, नवीन आरगडे, गणेश जगताप, ओंकार खुणे यांनी या कामगिरीत सहभाग घेतला.
