अमित मुंडीक
पुणे: मा. पोलीस अधीक्षक श्री संदीप सिंह गिल (पुणे ग्रामीण) यांच्या आदेशान्वये 30 ऑक्टोबर 2025 रोजी दहशतवाद (Pune Crime) विरोधी शाखा (Pune News) आणि स्थानिक गुन्हे शाखेच्या संयुक्त पथकाने केलेल्या कारवाईत तीन संशयितांना अटक करण्यात आली आहे. या कारवाईत पोलिसांनी तिन्ही आरोपींकडून तीन गावठी पिस्तुल, नऊ जिवंत काडतुसे आणि एक मोटारसायकल असा एकूण 1,75,000 रुपये किमतीचा मुद्देमाल जप्त केला आहे.
गोपनीय माहितीच्या आधारे पोलिसांना नारायणगाव एस.टी. स्टँड परिसरात तीन इसम संशयास्पद हालचाल करत असल्याचे समजले. त्यानुसार पोलिसांनी सापळा रचून तिन्ही संशयितांना ताब्यात घेतले. अटक करण्यात आलेल्या आरोपींची नावे धनंजय चक्रधर साळुंखे (वय 20, रा. कारेगाव, ता. शिरूर), सुरज आप्पासाहेब कडीले (वय 18, रा. रामलिंग, शिरूर) आणि अनमोल दादाभाऊ जाधव (वय 27, रा. कारेगाव, ता. शिरूर) अशी आहेत.
या आरोपींविरुद्ध नारायणगाव पोलीस ठाण्यात गुन्हा क्रमांक 228/2025 भा.दं.वि. कलम 3(1), 25 अंतर्गत गुन्हा दाखल करण्यात आला आहे. प्राथमिक चौकशीत धनंजय साळुंखे याच्यावर यापूर्वी शरीराविरुद्धचा एक गुन्हा नोंद असल्याचे उघड झाले आहे. आरोपींना न्यायालयात हजर केल्यानंतर त्यांना 4 नोव्हेंबर 2025 पर्यंत पोलीस कोठडी सुनावण्यात आली आहे. आरोपींनी शस्त्र खरेदी व बाळगण्यामागील हेतू काय होता, याचा तपास सुरू आहे.
या कारवाईचे कौतुक करताना पोलीस अधीक्षक संदीप सिंह गिल यांनी दहशतवाद विरोधी शाखा, स्थानिक गुन्हे शाखा आणि नारायणगाव पोलिसांचे अभिनंदन केले आहे.
ही कारवाई अपर पोलीस अधीक्षक रमेश चोपडे आणि उपविभागीय पोलीस अधिकारी धनंजय पाटील यांच्या मार्गदर्शनाखाली करण्यात आली. या पथकात पोलीस निरीक्षक अविनाश शिळीमकर, सहाय्यक पोलीस निरीक्षक प्रकाश पवार, महादेव शेलार, प्रविण सांगे तसेच अंमलदार विक्रम तापकीर, दीपक साबळे, मोसिन शेख, ओंकार शिंदे, गणेश चंदनशिव, हेमंत विरोळे, अक्षय नवले, रविंद्र जाधव, सुनील कोळी, संकेत जाधव आणि चेतन पाटील यांनी सहभाग घेतला.
