पुणे: पुण्यात उघडकीस आलेल्या भोंदूगिरी आणि लैंगिक अत्याचाराच्या प्रकरणात आरोपी ऋषिकेश वैद्य याला न्यायालयाकडून मोठा धक्का बसला आहे. पोलीस कोठडीत असताना पूजेसाठी साहित्य देण्याची त्याची मागणी न्यायालयाने स्पष्ट शब्दांत फेटाळून लावली आहे.
या प्रकरणाची पार्श्वभूमी पाहिली तर, स्वतःमध्ये देवी शक्तीचा संचार असल्याचा दावा करत वैद्यने एका महिलेचा विश्वास संपादन केला. सोशल मीडियाच्या माध्यमातून ओळख वाढवत “तुला उपासना शिकवतो” असे सांगून त्याने पीडितेला जाळ्यात ओढले. त्यानंतर तिच्यावर लैंगिक अत्याचार केल्याचा आरोप समोर आला. या गंभीर आरोपांनंतर पोलिसांनी त्याला अटक केली असून न्यायालयाने त्याला 6 एप्रिलपर्यंत पोलीस कोठडी सुनावली आहे.
दरम्यान, कोठडीत असताना पूजेसाठी आवश्यक साहित्य मिळावे यासाठी आरोपीने न्यायालयात अर्ज केला होता. सुरुवातीला न्यायालयाने तोंडी सूचना देत तपास अधिकाऱ्यांना याबाबत विचार करण्यास सांगितले होते. मात्र, पोलिसांनी सुरक्षा आणि तपासाच्या दृष्टीने हे साहित्य उपलब्ध करून दिले नाही. त्यानंतर बचाव पक्षाने ॲड. साजिद शहा यांच्या माध्यमातून पुन्हा औपचारिक अर्ज दाखल केला.
या अर्जाला सरकारी पक्ष आणि तपास अधिकाऱ्यांनी कडाडून विरोध केला. आरोपीला धार्मिक विधीच्या नावाखाली कोणतीही विशेष सवलत देणे तपासावर परिणाम करू शकते, तसेच सुरक्षा धोक्याची शक्यता असल्याचे नमूद करण्यात आले. यानंतर न्यायालयाने सर्व बाजू ऐकून हा अर्ज फेटाळून लावला.
नाशिकमधील अशोक खरात प्रकरणानंतर राज्यात भोंदूबाबांविरोधात कारवाईचा वेग वाढला असताना, या निर्णयामुळे अशा आरोपींना कोणतीही विशेष वागणूक दिली जाणार नाही, असा स्पष्ट संदेश गेला आहे.
