पुणे : कुख्यात गुंड निलेश घायवळ याच्या अडचणी दिवसेंदिवस वाढत चालल्या असून, लवकरच घायवळचा पासपोर्ट रद्द केला जाणार असल्याची माहिती मिळत आहे. कोथरूडमध्ये घडलेल्या गोळीबारानंतर (Pune Crime) घायवळ पोलीसांना फसवून स्वित्झर्लंडमध्ये पळून गेला आहे. मात्र, त्याच्यावर गंभीर गुन्ह्यांची नोंद असताना त्याला पासपोर्ट कसा मिळाला? असा प्रश्न उपस्थित करत पोलिसांवर टीका केली जात आहे.
अशातच नीलेश घायवळच्या पासपोर्ट प्रकरणाची चौकशी करताना पोलिसांच्या हाती महत्वाची माहिती लागली. घायवळने पुण्यात नाही तर अहिल्यानगरमधील आपल्या गावाच्या पत्तावर पासपोर्ट काढला होता, आणि विशेष म्हणजे पासपोर्टसाठी त्याने आपल्या आडनावात देखील बदल केला होता. ‘घायवळ’ ऐवजी ‘गायवळ’ नावाची कागदपत्रे त्याने सादर केली होती.
यानंतर पोलिसांनी त्याला गायवळच्या नावावर कोणत्याही गुन्ह्याची किंवा गुन्हेगारी कृत्याची नोंद नसल्याचे एनओसी दिले. तसेच पासपोर्ट ऑफीसला आपल्यावर गुन्हा दाखल नसल्याचे खोटे प्रतिज्ञापत्र देखील त्याने दिले होते. यामुळे त्याला पासपोर्ट मिळाला असल्याची माहिती पोलिसांनी दिली.
आता खोटी कागदपत्रे आणि नावात बदल करू मिळवलेला पासपोर्ट रद्द करण्याचे आदेश पुणे पोलिस आयुक्त अमितेशकुमार यांनी दिले आहेत. घायवळचा पासपोर्ट रद्द झाल्यानंतर त्याला लवकरच भारतात आणले जाऊ शकते अशी शक्यता वर्तवण्यात येत आहे.
दरम्यान, घायवळची सर्व बँक खाती गोठवण्यात आली असून त्याची बेकायदेशीर मालमत्ताही गोठवण्यात येणार असल्याचे आयुक्तांनी सांगितले आहे.
