अक्षय टेमगिरे
शिक्रापूर: दि. 5 नोव्हेंबर पुणे–अहिल्यानगर महामार्गावर कोयत्याचा धाक दाखवून जबरी चोरी करणाऱ्या आंतरजिल्हा चोरट्यांच्या टोळीचा पर्दाफाश करण्यात पुणे ग्रामीण पोलिसांना यश आले असुन स्थानिक गुन्हे शाखा व शिक्रापूर पोलीस स्टेशनच्या पथकाने संयुक्त कारवाई करत या टोळीतील तीन आरोपींना अटक करत तब्बल सहा गुन्हे उघडकीस आणले आहेत. पोलिसांनी आरोपींकडून 7.5 तोळे सोन्याचे दागिने, दोन कोयते आणि मोटारसायकल असा एकूण 5 लाख 62 हजार रुपये किंमतीचा मुद्देमाल हस्तगत केला आहे.
आकाश पांडुरंग शिंदे (वय 30), महेश मानाजी शिंदे (वय 31), राहूल रामदास पवार (वय 30) तिघे (रा. वेळद, ता. नगर, जि. अहिल्यानगर) अशी अटक करण्यात आलेल्या आरोपींची नवे आहेत.
दि. 4 जून 2025 रोजी पहाटेच्या सुमारास कोंढापुरी ता. शिरूर येथील सुरज पेट्रोल पंपाजवळ निसान टेरेनो कार क्र. MH 01 BU 0366 या कार मध्ये झोपलेल्या सोपान राधाकिसन आंधळे रा. शेवगाव, जि. अहिल्यानगर व त्यांच्या कुटुंबावर तीन अज्ञात चोरट्यांनी कोयत्याचा धाक दाखवून जबरी चोरी केली होती. चोरट्यांनी फिर्यादीकडून 500 रुपये व पत्नीच्या गळ्यातील दीड तोळ्याचे गंठन असा एकूण 90 हजार 500 रुपये किंमतीचा मुद्देमाल लंपास केला होता.
या घटनेनंतर शिक्रापूर पोलीस स्टेशनमध्ये गुन्हा दाखल करण्यात आला व गुन्ह्यांचा तपास सुरू करताना स्थानिक गुन्हे शाखेच्या पथकाने तब्बल 125 किलोमीटरपर्यंत सीसीटीव्ही फुटेज तपासले, तसेच गोपनीय बातमीदारांकडून माहिती मिळवून संशयितांचा मागोवा घेतला. पोलिसांनी शिक्रापूर, रांजणगाव, शिरूर जि. पुणे व सुपा जि. अहिल्यानगर पोलीस ठाण्यांतील एकूण सहा गुन्हे उघडकीस आणले, ज्यामध्ये कोयत्याचा धाक दाखवून जबरी चोरी, दरोडा व मालमत्ता चोरीचे गुन्हे आहेत.
या सर्व आरोपींचा गुन्हेगारी इतिहास असून आरोपी आकाश शिंदे याच्यावर 8 गुन्हे, महेश शिंदे याच्यावर 6 गुन्हे तर राहुल पवार याच्यावर 2 गुन्हे दाखल असल्याचे पोलिस तपासात स्पष्ट झाले आहे. सध्या तीनही आरोपींना न्यायालयीन कोठडी रिमांड देण्यात आले आहे.
ही धडाकेबाज कारवाई पोलिस अधीक्षक संदीपसिंह गिल्ल पुणे ग्रामीण, अपर पोलीस अधीक्षक रमेश चोपडे, व उपविभागीय पोलीस अधिकारी प्रशांत ढोले शिरूर विभाग यांच्या मार्गदर्शनाखाली करण्यात आली आहे.
या कारवाईत स्थानिक गुन्हे शाखेचे पोलीस निरीक्षक अविनाश शिळीमकर, शिक्रापूर पो.स्टे.चे पो.नि. दिपरतन गायकवाड, शिरूरचे पो.नि. संदेश केंजळे, रांजणगावचे पो.नि. महादेव वाघमोडे, तसेच पो.सई महेश डोंगरे, विजय मस्कर, पो.अंमलदार तुषार पंदारे, जनार्दन शेळके, राजू मोमीण, संजू जाधव, सागर धुमाळ, जयराज देवकर, अमोल नलगे, अमोल दांडगे, रोहीत पारखे यांनी ही कामगिरी पार पाडली आहे. पुणे ग्रामीण पोलिसांची जबरी चोरी विरोधात प्रभावी कारवाई या कारवाईमुळे पुणे अहिल्यानगर महामार्गावरील चोऱ्यांच्या मालिकेला आळा बसण्याची अपेक्षा व्यक्त केली जात आहे.
