Vadgaon Nagarpanchayat Election: महाराष्ट्रात सर्वत्र येत्या निवडणुकीची धामधुम सुरु झाली आहे. याच दरम्यान वडगाव नगरपंचायत सार्वत्रिक निवडणुकीसाठी उमेदवारी अर्ज दाखल करण्यास आता अवघे दोनच दिवस उरले आहेत. त्याच पार्श्वभूमीवर राष्ट्रवादी काँग्रेसने आपली पहिली अधिकृत उमेदवारांची यादी जाहीर केली आहे. या यादीमुळे स्थानिक राजकारणात एकदम चुरस वाढली आहे. ही घोषणा राष्ट्रवादी काँग्रेसचे तालुकाध्यक्ष गणेश खांडगे यांनी केली. या वेळी ज्येष्ठ नेते गणेशाप्पा ढोरे, सुनील चव्हाण, मंगेश ढोरे, तुकाराम ढोरे, बाळासाहेब ढोरे, शहराध्यक्ष प्रवीण ढोरे, दत्तात्रय कुडे, चंद्रकांत ढोरे यांसह मोठ्या संख्येने पदाधिकारी उपस्थित होते. या यादीमुळे राष्ट्रवादी काँग्रेसची निवडणूक मोहीम आणखी आक्रमक होणार, असं राजकीय वर्तुळात बोललं जातंय. (Pune Politics Latest News)
घड्याळ चिन्हावर निवडणूक लढायचा निर्धार
पहिली यादी जाहीर होताच पक्षाच्या कार्यकर्त्यांमध्ये उत्साहाचं वातावरण आहे. काही महिन्यांपासून सुरू असलेल्या संघटनात्मक बैठका, युवक आणि महिलांचा सहभाग. या सर्वांना यादी जाहीर झाल्यानंतर आणखीच गती मिळाल्याचं दिसत आहे. यंदाची निवडणूक पक्ष ‘घड्याळ’या अधिकृत चिन्हावर लढवली जाणार आहे. पाणीपुरवठा, रस्ते, गटारव्यवस्था, स्वच्छता, व्यापाऱ्यांच्या समस्या अशा स्थानिक मुद्द्यांवर भर देत विकासाच्या अजेंड्यावर निवडणूक लढायची असा निर्धार पक्षाने केला आहे.
आतली गटबाजी आटोक्यात?
उमेदवार निवडीवरून गेल्या काही दिवसांत पक्षात अंतर्गत चर्चा होत होती. मात्र पहिली यादी जाहीर होताच ही धुसफूस काही प्रमाणात कमी झाल्याच्या चर्चा आहेत. प्रभागनिहाय दिलेल्या नावांमध्ये सर्व गटांचा समतोल साधल्याने पक्ष स्थानिक स्तरावर एकत्र दिसतोय.
प्रभागनिहाय जाहीर केलेले उमेदवार
- प्रभाग 1 : पुनम विकी भोसले, मिरा चंद्रकांत पारधी
- प्रभाग 2 : प्रवीण विठ्ठल ढोरे
- प्रभाग 3 : भाऊसाहेब तुकाराम ढोरे
- प्रभाग 4 : सुनिता राहुल ढोरे
- प्रभाग 5 : वैशाली पंढरीनाथ ढोरे
- प्रभाग 6 : मयुर प्रकाश ढोरे
- प्रभाग 7 : अजय भवार
- प्रभाग 8 : माया चव्हाण
- प्रभाग 10 : आकांक्षा वाघवले
- प्रभाग 11 : सुनील गणेश ढोरे
- प्रभाग 12 : गणेश सोपान म्हाळसकर
- प्रभाग 13 : अजय बाळासाहेब म्हाळसकर
- प्रभाग 14 : वैशाली गौतम सोनवणे
- प्रभाग 15 : राजेंद्र विठ्ठल कुडे
- प्रभाग 16 : मिनाक्षी गणेश ढोरे
- प्रभाग 17 : अर्चना ज्ञानेश्वर ढोरे
उद्या उमेदवारी अर्जासह शक्तीप्रदर्शन
घोषित केलेले सर्व उमेदवार उद्या मोठ्या जल्लोषात, जनसंपर्क मोर्चा काढत उमेदवारी अर्ज दाखल करणार अशी शक्यता आहे. निवडणूक जिंकण्यासाठी सर्वांनी एकदिलाने काम करावं, असं आवाहन पक्षाने केलं आहे.
