विशाल शिंदे
पुणे: आलिशान फॉर्च्युनर कारमधून अग्नीशस्त्रे घेऊन फिरणाऱ्या दोन सराईत गुन्हेगारांना नऱ्हे पोलिसांच्या तपास पथकाने ताब्यात घेतले असून, त्यांच्याकडून दोन पिस्तूल आणि तीन जिवंत काडतुसे जप्त करण्यात आली आहेत. या कारवाईत सुमारे ६ लाख १३ हजार रुपयांचा मुद्देमाल जप्त करण्यात आला आहे. नऱ्हे पोलिसांच्या गुन्हे प्रतिबंधक कारवाईतील ही आणखी एक धडाकेबाज कामगिरी मानली जात आहे.
पोलिसांनी दिलेल्या माहितीनुसार, १० ऑगस्ट २०२६ रोजी नऱ्हे पोलीस ठाण्याच्या हद्दीत वरिष्ठांच्या आदेशानुसार गुन्हे प्रतिबंधक पेट्रोलिंग सुरू होते. यावेळी पोलीस उपनिरीक्षक विजय घाडगे, पोलीस अंमलदार निलेश भोरडे, प्रणिल मेस्त्री, कार्तिक कोंडे, देवा चव्हाण, धुळा गारळे आणि राजू तोरे हे पथक पेट्रोलिंग करीत होते.
दरम्यान, पोलीस उपनिरीक्षक विजय घाडगे, पोलीस अंमलदार निलेश भोरडे, कार्तिक कोंडे आणि सुनील चव्हाण यांना गोपनीय बातमीदारामार्फत माहिती मिळाली की, काही संशयित व्यक्ती चारचाकी वाहनातून अग्नीशस्त्रे घेऊन फिरत आहेत. या माहितीच्या आधारे पोलिसांचे पथक तातडीने पारी कंपनी चौक ते उंबऱ्या गणपती चौकाकडे जाणाऱ्या रस्त्यावर, अयोध्या प्युअर व्हेज, बेनकर वस्ती, धायरी, पुणे येथे पोहोचले.
पोलिसांनी परिसरात पाहणी केली असता रस्त्याच्या कडेला MH 14 CK 0004 क्रमांकाची फॉर्च्युनर कार संशयास्पदरीत्या थांबलेली आढळली. पोलिसांनी कारची तपासणी केली असता त्यामध्ये दोन इसम आढळून आले. त्यांना ताब्यात घेऊन चौकशी केली असता त्यांनी आपली नावे शुभम ऊर्फ सोनू अनिल शिंदे (वय २६, रा. महर्षी नगर, स्वारगेट, पुणे) आणि अथर्व ऊर्फ आप्पा उमाकांत सणस (वय २३, रा. शितळादेवी चौक, गुरुवार पेठ, पुणे) अशी सांगितली.
पंचांसमक्ष दोन्ही संशयितांची अंगझडती तसेच वाहनाची तपासणी करण्यात आली. त्यावेळी वाहनाच्या आर्मरेस्टसमोरील भागात एक पिस्तूल आणि त्याच्या मॅग्झिनमध्ये एक जिवंत काडतूस आढळून आले. पोलिसांनी हे अग्नीशस्त्र आणि काडतूस जप्त केले. तसेच गुन्ह्यात वापरलेली फॉर्च्युनर कारही पोलिसांनी जप्त केली.
यानंतर आरोपी पोलीस कोठडीत असताना पोलिसांनी कौशल्यपूर्ण व तांत्रिक तपासाच्या आधारे अधिक चौकशी केली. या तपासादरम्यान आणखी एक पिस्तूल आणि दोन जिवंत काडतुसे जप्त करण्यात पोलिसांना यश आले. अशाप्रकारे दोन्ही आरोपींकडून एकूण दोन पिस्तूल आणि तीन जिवंत काडतुसे हस्तगत करण्यात आली आहेत.
या कारवाईत अग्नीशस्त्रे, जिवंत काडतुसे आणि फॉर्च्युनर कार असा एकूण ६ लाख १३ हजार रुपयांचा मुद्देमाल जप्त करण्यात आल्याची माहिती पोलिसांनी दिली आहे. दोन्ही आरोपी सराईत गुन्हेगार असल्याचे पोलिसांकडून सांगण्यात आले असून, ही शस्त्रे त्यांनी नेमक्या कोणत्या उद्देशाने बाळगली होती, त्यांचा यापूर्वीच्या गुन्ह्यांशी संबंध आहे का, तसेच या शस्त्रांचा पुरवठा कोणी केला याचा तपास सुरू आहे. या प्रकरणाचा पुढील तपास पोलीस उपनिरीक्षक विजय घाडगे करीत आहेत.
ही कारवाई पुणे शहराचे पोलीस आयुक्त अमितेश कुमार, सहपोलीस आयुक्त संजय दराडे, पश्चिम प्रादेशिक विभागाचे अपर पोलीस आयुक्त राजेश बनसोडे, परिमंडळ-३ चे पोलीस उपायुक्त डॉ. सागर कवडे, सिंहगड रोड विभागाचे सहायक पोलीस आयुक्त विजय कुंभार, वरिष्ठ पोलीस निरीक्षक वर्षा देशमुख आणि पोलीस निरीक्षक (गुन्हे) ईश्वर चव्हाण यांच्या मार्गदर्शनाखाली करण्यात आली.
कारवाईत पोलीस उपनिरीक्षक विजय घाडगे यांच्यासह पोलीस अंमलदार पांडुरंग पवार, निलेश भोरडे, प्रणिल मेस्त्री, देवा चव्हाण, सुनील चव्हाण, कार्तिक कोंडे, राजू तोरे, नितीन वाघमारे, धुळा गारळे, गोविंदराव कपाटे, स्वप्नील सूर्यवंशी आणि सुमित जगझाप यांच्या पथकाने सहभाग घेतला.
