पुणे: पुण्यातील खडकी परिसरात घटस्फोटाच्या वादातून पत्नीवर जीवघेणा हल्ला केल्याची धक्कादायक घटना समोर आली आहे. जयंती कार्यक्रमादरम्यान घडलेल्या या प्रकारात महिलेवर धारदार हत्याराने वार करण्यात आले असून ती गंभीर जखमी झाली आहे. या प्रकरणी पोलिसांनी आरोपी पतीला अटक केली आहे. (Pune Crime)
अटक करण्यात आलेल्या आरोपीचे नाव राहुल महादेव कांबळे (वय 30) असे आहे. तर जखमी महिलेचे नाव सायली सयाजी भिसे (वय 22) असे आहे. सायली यांनी या प्रकरणी खडकी पोलीस ठाणे येथे फिर्याद दिली आहे.
मिळालेल्या माहितीनुसार, सायली आणि राहुल यांचा काही महिन्यांपूर्वी आळंदी येथे विवाह झाला होता. मात्र वैवाहिक वादामुळे दोघे वेगळे राहत होते आणि त्यांचा घटस्फोटाचा खटला न्यायालयात सुरू आहे. 14 एप्रिल रोजी डॉ. बाबासाहेब आंबेडकर जयंतीनिमित्त औंध रोडवरील कार्यक्रमाला सायली मैत्रिणीसोबत गेली होती. कार्यक्रम संपल्यानंतर रात्री सुमारे 11.45 वाजता घरी जात असताना आरोपी राहुल त्यांच्या समोर आला.
यावेळी त्याने सायली यांच्यावर मारहाण सुरू केली. त्यांनी प्रतिकार करण्याचा प्रयत्न केला असता आरोपीने चाकूसदृश धारदार हत्याराने कपाळ, गाल, खांदा, पाठ आणि ओठाखाली वार केले. या हल्ल्यात सायली गंभीर जखमी झाली.
सायली यांनी आरोप केला आहे की, आरोपीला अटक करण्यात आली असली तरी त्याच्यावर कठोर कारवाई झालेली नाही. तसेच त्याला कोणाचा तरी पाठिंबा मिळत असल्याचा संशयही त्यांनी व्यक्त केला आहे. दरम्यान, या प्रकरणाचा पुढील तपास पोलिसांकडून सुरू आहे.
