पुणे : राष्ट्रवादी काँग्रेसचे संस्थापक (Sharad Pawar Health Update) आणि ज्येष्ठ नेते शरद पवार यांची प्रकृती रविवारी काहीशी बिघडल्याने त्यांना पुण्यातील रुबी हॉल क्लीनिक (Ruby Hall Clinic) येथे दाखल करण्यात आले आहे. शरीरातील पाण्याची पातळी कमी झाल्यामुळे त्यांना अशक्तपणा आणि थकवा जाणवत असल्याची माहिती रुग्णालयाकडून देण्यात आली. (Latest Marathi News)
गेल्या काही दिवसांत पवार यांच्या प्रकृतीत चढ-उतार होत असल्याचे दिसून येत आहे. काही दिवसांपूर्वी त्यांना श्वसनाचा त्रास जाणवत असल्याने बारामतीहून पुण्यात हलवण्यात आले होते. त्यानंतर पाच दिवसांच्या उपचारानंतर 15 फेब्रुवारी रोजी त्यांना घरी सोडण्यात आले होते. मात्र रविवारी पुन्हा अस्वस्थ वाटू लागल्याने डॉक्टरांच्या सल्ल्यानुसार त्यांना रुग्णालयात दाखल करण्यात आले.
रुबी हॉल क्लिनिकचे वैद्यकीय संचालक डॉ. परवेझ ग्रँट यांनी प्रसारमाध्यमांना माहिती देताना सांगितले की, पवार यांना दोन दिवस निरीक्षणाखाली ठेवण्यात येणार आहे. त्यांची रक्तचाचणी तसेच सिटीस्कॅन करण्यात आला असून प्राथमिक अहवाल समाधानकारक आहेत. सध्या कोणतीही गंभीर समस्या आढळलेली नसली तरी वयोमानानुसार आवश्यक काळजी घेतली जात आहे.
दरम्यान, पवार यांचे निकटवर्तीय विठ्ठल मणियार यांनी रुग्णालयात भेट देऊन त्यांच्या प्रकृतीची चौकशी केली. त्यांनी सांगितले की, गेल्या आठवड्याभरापासून पवार थोडे अस्वस्थ होते. नियमित तपासणी आणि काही वैद्यकीय चाचण्यांसाठी डॉक्टरांनी त्यांना बोलावले होते. “त्यांची प्रकृती स्थिर आहे. गंभीर चिंतेचे कारण नाही,” असे त्यांनी स्पष्ट केले.
राज्यातील राजकारणात सक्रिय असलेले आणि अनेक दशकांचा अनुभव असलेले शरद पवार यांच्या प्रकृतीविषयी नेहमीच उत्सुकता आणि चिंता व्यक्त होत असते. सध्या त्यांना निरीक्षणाखाली ठेवण्यात आले असून पुढील 2 दिवसांत डॉक्टर त्यांच्या अहवालांच्या आधारे घरी सोडण्याबाबत निर्णय घेणार आहेत. त्यांच्या प्रकृतीबाबत सकारात्मक संकेत मिळत असले तरी समर्थक आणि कार्यकर्त्यांमध्ये काळजीचे वातावरण आहे.
