पुणे : दुष्काळग्रस्त तालुक्यांतील पात्र शेतकऱ्यांना दिवाळीपूर्वी आर्थिक दिलासा देण्यासाठी शासनाने जाहीर केलेल्या दिवाळी अग्रीम मदतीचे वितरण सुरू आहे. या योजनेंतर्गत पुणे जिल्ह्यातील ३ लाख २८ हजार ५४२ शेतकऱ्यांच्या बँक खात्यांत एकूण १६४ कोटी २७ लाख रुपये जमा करण्यात आले आहेत. पात्र शेतकऱ्यांना प्रत्येकी पाच हजार रुपये याप्रमाणे ही मदत देण्यात आली आहे.
राज्यातील दुष्काळी परिस्थिती लक्षात घेता सणासुदीच्या काळात शेतकऱ्यांना आर्थिक आधार मिळावा, यासाठी दुष्काळग्रस्त तालुक्यांतील पात्र शेतकऱ्यांना पाच हजार रुपये दिवाळी अग्रीम देण्याची घोषणा शासनाने केली होती. त्यानुसार महसूल, मदत व पुनर्वसन आणि कृषी विभागाच्या माध्यमातून मदत वितरणाची प्रक्रिया राबवण्यात आली. ५ नोव्हेंबर २०२६ अखेर पुणे जिल्ह्यातील ३ लाख २८ हजार ५४२ शेतकऱ्यांना १६४ कोटी २७ लाख रुपयांचे वितरण पूर्ण झाले आहे.
शेतकऱ्यांना मदतीची रक्कम थेट त्यांच्या बँक खात्यांत जमा करण्यावर शासनाने भर दिला आहे. यासाठी महसूल, मदत व पुनर्वसन आणि कृषी विभागातील अधिकारी व कर्मचाऱ्यांनी समन्वयाने काम केले. परिणामी जिल्ह्यातील लाखो शेतकऱ्यांना दिवाळीच्या काळात आर्थिक आधार मिळाला आहे.
काही शेतकऱ्यांच्या बँक खात्यांशी संबंधित तांत्रिक अडचणी, खाते तपशिलातील त्रुटी किंवा अन्य कारणांमुळे मदतीची रक्कम जमा होण्यास विलंब झाला आहे. अशा शेतकऱ्यांच्या अडचणी दूर करून त्यांनाही मदत देण्याची कार्यवाही सुरू आहे.
जिल्ह्यातील एकही पात्र शेतकरी या मदतीपासून वंचित राहू नये, यासाठी संबंधित यंत्रणांना आवश्यक कार्यवाही करण्याच्या सूचना देण्यात आल्या आहेत. तांत्रिक अडचणींचे निराकरण झाल्यानंतर उर्वरित पात्र शेतकऱ्यांच्या खात्यांतही मदतीची रक्कम जमा करण्यात येणार आहे.
