पुणे: पुणे शहराच्या मध्यवस्तीत असलेल्या (Pune Shocking News) नाना पेठ परिसरातून माणुसकीला काळीमा फासणारी एक अत्यंत धक्कादायक घटना समोर आली आहे. एका १५ वर्षीय अल्पवयीन मुलीला लग्नाचे (Pune Crime) आमिष दाखवून तिच्यावर वारंवार अत्याचार करण्यात आले. या नराधमाने मुलीला केवळ गर्भवतीच केले नाही, तर तिची प्रसूती घरीच झाल्याचे समजल्यावर पीडितेने स्वतःच नाळ कापल्याचा थरार समोर आला आहे. समर्थ पोलिसांनी या प्रकरणी गुन्हा दाखल करून नराधम आरोपीला बेड्या ठोकल्या आहेत. (Breaking News)
पीडित मुलगी आपल्या आत्याकडे राहायची. घरातील सदस्य कामानिमित्त बाहेर गेल्याचा फायदा घेऊन आरोपीने तिच्याशी जवळीक साधली. लग्नाचे स्वप्न दाखवून त्याने मुलीवर अत्याचार केले. धक्कादायक बाब म्हणजे, मुलीला गर्भधारणा झाल्यानंतर आरोपीने तिला एक इंजेक्शन दिल्याची माहिती समोर आली आहे, ज्याचा उद्देश कदाचित गर्भपात करणे हा असावा. मात्र, १ फेब्रुवारी रोजी जेव्हा मुलीची मोठी बहीण तिला भेटायला घरी आली, तेव्हा घराचा दरवाजा बराच वेळ उघडला गेला नाही. बहीण घरात शिरली असता तिला सर्वत्र रक्त सांडलेले दिसले आणि हा भीषण प्रकार उघड झाला.
पीडित अल्पवयीन मुलीने घराच्या बंद खोलीत स्वतःची प्रसूती केली. सध्या मुलगी आणि नवजात बाळ या दोघांची प्रकृती स्थिर असून ससून रुग्णालयात त्यांच्यावर उपचार सुरू आहेत. पोलिसांनी दिलेल्या माहितीनुसार, आरोपीला पीडितेच्या कौटुंबिक परिस्थितीची पूर्ण कल्पना होती आणि मुलगी अल्पवयीन आहे हे माहीत असूनही त्याने तिचे लैंगिक शोषण केले.
समर्थ पोलिसांनी आरोपीविरुद्ध भारतीय न्याय संहिता आणि पोक्सो कायद्यातील विविध कलमांन्वये गुन्हा दाखल केला आहे. आरोपी हा सराईत गुन्हेगार नसला तरी, त्याने यापूर्वी अशा प्रकारे इतर कोणाला जाळ्यात ओढले आहे का, याचा तपास पोलीस करत आहेत.
