Pune News : पुणे : शहराच्या हवाई वाहतुकीसाठी महत्त्वाची घडामोड समोर आली आहे. पुणे विमानतळावर 15 अतिरिक्त फ्लाइट स्लॉट्स वाढवण्यात आले असून, एकूण स्लॉट्सची संख्या आता 220 वरून 235 झाली आहे. या वाढीमुळे प्रवाशांना अधिक सोयीस्कर आणि जलद प्रवासाची सुविधा मिळणार आहे.
मिळालेल्या माहितीनुसार, नव्या स्लॉट्समुळे विमान कंपन्यांना अधिक उड्डाणे सुरू करण्याची संधी उपलब्ध झाली आहे. त्यामुळे पुणे शहराला मंगळुरू, सोलापूर आणि बागडोगरा या नव्या शहरांशी थेट हवाई जोडणी मिळणार आहे. या नव्या मार्गांमुळे पर्यटन, व्यापार आणि उद्योग क्षेत्राला चालना मिळण्याची अपेक्षा व्यक्त केली जात आहे.
विशेष म्हणजे सोलापूरसारख्या शहराला थेट हवाई सेवा मिळाल्यामुळे दक्षिण महाराष्ट्र आणि आसपासच्या भागातील प्रवाशांना मोठा फायदा होणार आहे. यामुळे वेळेची बचत होऊन प्रवास अधिक सोपा होईल.
या निर्णयामागे केंद्रीय नागरी विमान वाहतूक राज्यमंत्री मुरलीधर मोहोळ यांच्या प्रयत्नांचा मोठा वाटा असल्याचे सांगितले जात आहे. त्यांनी पुणे विमानतळाच्या क्षमतेत वाढ करण्यासाठी सातत्याने पाठपुरावा केला होता.
सध्या पुणे विमानतळ ‘उडान’ योजनेअंतर्गत काही महत्त्वाच्या शहरांशी जोडले गेले आहे. आता नव्या उड्डाणांमुळे ही कनेक्टिव्हिटी आणखी मजबूत होणार आहे. तसेच प्रवाशांच्या सोयीसाठी विमानतळावर सुविधा सुधारण्याचे कामही सुरू आहे.
1 मे 2026 पासून नव्या उड्डाणांचे वेळापत्रक लागू होणार असून, पुणेकरांना अधिक पर्याय उपलब्ध होणार आहेत. या बदलामुळे पुणे शहराचा देशातील हवाई नकाशावर अधिक मजबूत ठसा उमटणार असल्याचे मानले जात आहे.
