पुणे: 13 डिसेंबर 2025 रोजी होणाऱ्या राष्ट्रीय (Pune News) लोकअदालतीदरम्यान न्यायालयात मोठी गर्दी होऊ नये आणि नागरिकांना त्रास होऊ नये यासाठी महत्त्वाचा निर्णय घेण्यात आला आहे. जिल्हा विधी सेवा प्राधिकरणाने सांगितले की, 1 नोव्हेंबर 2025 पूर्वी न्यायालयात दाखल असलेल्या आणि ज्यांना लोकअदालतीची नोटीस पाठवण्यात आली आहे, फक्त तीच प्रकरणे या लोकअदालतीत ठेवण्यात येणार आहेत. याशिवाय इतर कोणतीही प्रकरणे, विशेषतः मोटार वाहन संबंधित प्रकरणे, लोकअदालतीत ठेवण्यात आलेली नाहीत.
तसेच 13 सप्टेंबर 2025 रोजी आयोजित केलेल्या लोकअदालतीच्या दिवशी ज्यांना टोकन मिळाले होते, त्यांची प्रकरणेही या लोकअदालतीत घेतली जाणार नाहीत, अशीही स्पष्ट माहिती देण्यात आली आहे. नागरिकांनी या निर्णयाची नोंद घ्यावी, जेणेकरून अनावश्यक न्यायालयीन गर्दी आणि गोंधळ टाळता येईल.
पुणे जिल्हा विधी सेवा प्राधिकरण, पुणे शहर वाहतूक विभाग, पिंपरी-चिंचवड वाहतूक विभाग आणि महामार्ग वाहतूक विभाग यांनी संयुक्तपणे हे आवाहन केले आहे. अधिकारी म्हणतात की, लोकअदालतीचा उद्देश जलद आणि सोपी तडजोड करणे हा आहे. त्यामुळे ज्या प्रकरणांना नोटीस दिली आहे, तेवढ्याच प्रकरणांची सुनावणी होणार आहे. या निर्णयामुळे लोकअदालतीतील कामकाज सुरळीत आणि सुटसुटीत पार पडेल, अशी अपेक्षा व्यक्त केली आहे.
