Pune News: पुणे : पुणे विमानतळावरून प्रवास करणाऱ्या नागरिकांसाठी दिलासादायक बातमी आहे. भारतीय विमानतळ प्राधिकरण यांच्यावतीने येथे भारत टॅक्सी (Bharat Taxi) ही नवीन आणि परवडणारी टॅक्सी सेवा सुरू करण्यात आली आहे. सध्या ही सेवा प्रायोगिक तत्त्वावर सुरू करण्यात आली असून पुणे हा त्यासाठी निवडण्यात आलेल्या निवडक विमानतळांपैकी एक आहे. या सेवेमुळे प्रवाशांना सुरक्षित, सोपा आणि किफायतशीर प्रवासाचा पर्याय उपलब्ध होणार आहे.
या सेवेमधील सर्वात महत्त्वाची बाब म्हणजे निश्चित दर पद्धत. गर्दीची वेळ असो किंवा रात्री उशिरा प्रवास असो, भाड्यात कोणतीही वाढ होणार नाही. प्रति किलोमीटर ठराविक दरानेच प्रवाशांकडून पैसे आकारले जाणार आहेत. त्यामुळे प्रवाशांना प्रवास सुरू करण्यापूर्वीच अंदाजे खर्च किती येईल याची माहिती मिळेल. यामुळे भाड्याबाबत पारदर्शकता राहील आणि प्रवाशांचा विश्वास वाढेल.
ही सेवा राष्ट्रीय सहकारी विकास महामंडळामार्फत चालवली जाणार आहे. या योजनेत वाहनचालक स्वतः गाडीचा मालक असणे आवश्यक आहे. त्यामुळे कोणत्याही एजंट किंवा मध्यस्थांना कमिशन द्यावे लागणार नाही. संपूर्ण कमाई थेट चालक-मालकाकडे जाणार असल्याने त्यांच्या उत्पन्नात वाढ होण्याची शक्यता आहे. चालकांसाठीही ही योजना फायदेशीर ठरणार आहे.
भारत टॅक्सी अॅप वापरण्यास सोपे
प्रवाशांसाठी सुरक्षित आणि वापरण्यास सोपे मोबाइल अॅप विकसित करण्यात आले आहे. या अॅपच्या माध्यमातून टॅक्सी बुकिंग, भाड्याची माहिती आणि प्रवासाचा तपशील सहज मिळू शकतो. वाढत्या भाड्यांबाबत येणाऱ्या तक्रारी लक्षात घेऊन 5 फेब्रुवारीपासून हा उपक्रम सुरू करण्यात आला आहे.
प्रायोगिक टप्प्यात ही सेवा देशातील 11 विमानतळांवर सुरू करण्यात येत आहे. यामध्ये पुण्यासह राजकोट, पटना, वडोदरा, भुज, छत्रपती संभाजीनगर, सुरत, कानपूर, वाराणसी, आग्रा आणि प्रयागराज या शहरांचा समावेश आहे. या निर्णयामुळे विमानतळ प्रवास अधिक सोपा, सुरक्षित आणि परवडणारा होईल, अशी अपेक्षा व्यक्त केली जात आहे.
