Pune Municipal Corporation election: पिंपरी-चिंचवड : पिंपरी-चिंचवड महानगरपालिका निवडणुकीसाठी बुधवारी तिकीट नाकारल्यानंतर शिवसेनेच्या एका महिला पदाधिकाऱ्याने पक्षाच्या माजी आमदारावर गंभीर आरोप केले आहेत. उद्धव बाळासाहेब ठाकरे गटातील या महिला पदाधिकाऱ्याने पिंपरी येथे आयोजित पत्रकार परिषदेत हे आरोप करत खळबळ उडवून दिली.
काळेवाडी परिसरात राहणाऱ्या या महिला पदाधिकाऱ्याने शिवसेनेचे माजी आमदार अॅड. गौतम चाबुकस्वार यांच्यावर गैरवर्तन, लैंगिक छळ आणि धमकी दिल्याचा आरोप केला आहे. पत्रकार परिषदेत बोलताना त्यांनी सांगितले की, त्या अनेक वर्षांपासून शिवसेनेचे काम प्रामाणिकपणे करत आहेत. घराघरात पक्ष पोहोचवण्यासाठी त्यांनी मोठे योगदान दिले असूनही पक्षाने त्यांच्या उमेदवारीबाबत अन्याय केला आहे, असे त्यांचे म्हणणे आहे.
त्या म्हणाल्या की, पक्षाच्या वरिष्ठ नेतृत्वावर आपला आक्षेप नाही, मात्र स्थानिक पातळीवर माजी आमदार गौतम चाबुकस्वार यांनीच आपली उमेदवारी रोखल्याचा आरोप त्यांनी केला. चाबुकस्वार यांचे महिलांशी वर्तन योग्य नसून, स्वतःच्या मागण्या पूर्ण करण्यासाठी ते पक्षावर दबाव टाकतात, असेही त्यांनी सांगितले. तसेच त्यांनी आपल्या कुटुंबाला गायब करण्याची धमकी दिल्याचा गंभीर आरोपही या महिला पदाधिकाऱ्याने केला.
या महिला पदाधिकाऱ्याने पुढे सांगितले की, यापूर्वी पक्षातील काही वरिष्ठ नेत्यांचा आपल्याला पाठिंबा होता. मावळचे खासदार अप्पा बारणे आपल्यासोबत असल्याचे त्यांनी नमूद केले. मात्र, शिवसेना फुटीनंतर परिस्थिती बदलली आणि त्यानंतर चाबुकस्वार यांचे वर्तन अधिक त्रासदायक झाले, असा दावा त्यांनी केला.
मातोश्री येथे जाताना सामान्य कार्यकर्त्यांना डावलले जाते, अशी खंतही त्यांनी व्यक्त केली. शिवसेना नेहमी कार्यकर्त्यांना कुटुंबासारखे वागवते, मात्र अशा व्यक्तींमुळे पक्षातील महिलांची संख्या कमी होत असल्याचे त्यांनी सांगितले. तरीही आपण पक्षाशी एकनिष्ठ राहणार असल्याचेही त्यांनी स्पष्ट केले.
