पुणे: राज्यातील नगरपरिषद (Pune Elections) निवडणुकांच्या प्रचाराला काही (Local Bodies Election) तास बाकी असताना निवडणूक आयोगाने मोठा निर्णय घेतला आहे. सोमवारी रात्री प्रचार थांबणार असतानाच आयोगाने राज्यातील 22 नगरपरिषदांच्या अध्यक्षपदाच्या निवडणुका पुढे ढकलल्या आहेत. त्यामुळे अनेक कार्यकर्ते आणि उमेदवारांच्या उत्साहावर विरजण पडले असून वातावरणात संभ्रम निर्माण झाला आहे. (Breaking News)
पुणे जिल्ह्यातील काही महत्त्वाच्या नगरपरिषदांच्या निवडणुकांमध्येही मोठा बदल करण्यात आला आहे. पुणे जिल्ह्यातील बारामती आणि फुरसुंगी–उरुळी देवाची या नगरपरिषदांच्या नगराध्यक्ष आणि सदस्य पदांसाठी 2 डिसेंबरला होणारे मतदान रद्द करण्यात आले आहे. निवडणूक आयोगाच्या नव्या आदेशानुसार या दोन्ही ठिकाणी 20 डिसेंबर रोजी मतदान घेतले जाणार आहे.
त्याचप्रमाणे इतर काही नगरपरिषदांमधील जागांच्या निवडणुकाही पुढे ढकलण्यात आल्या आहेत. तळेगाव दाभाडे नगरपरिषदेत जागा क्रमांक 2 (A), 7 (A), 7 (B), 8 (A), 8 (B), लोणावळा नगरपरिषदेत जागा क्रमांक 5 (B) आणि 10 (A), दौंड नगरपरिषदेतील जागा क्रमांक 9 (A) आणि सासवड नगरपरिषदेत जागा क्रमांक 11 (A) या जागांची निवडणूकही आता 20 डिसेंबर रोजी होणार आहे. मतमोजणी 21 डिसेंबर रोजी घेतली जाईल.
या बदलामागे अनेक उमेदवारांनी दाखल केलेल्या न्यायालयीन अपीलांमुळे निर्माण झालेली अडचण कारणीभूत ठरली आहे. काही ठिकाणी निवडणूक निर्णय अधिकाऱ्यांनी अपीलांचे निकाल लागू होण्याआधीच मतदान चिन्हांचे वाटप केले होते. नियमांनुसार नामनिर्देशन मागे घेण्यासाठी तीन दिवसांचा कालावधी देणे आवश्यक असून, काही ठिकाणी ही प्रक्रिया पूर्ण झाली नव्हती. त्यामुळे ही कार्यवाही नियमबाह्य असल्याचे आयोगाने स्पष्ट केले आहे.
निवडणूक आयोगाच्या सुधारित कार्यक्रमानुसार, नवीन निवडणूक वेळापत्रक 4 डिसेंबर रोजी जाहीर करण्यात येणार आहे. उमेदवारांना नामनिर्देशन मागे घेण्यासाठी 10 डिसेंबर रोजी दुपारी 3 वाजेपर्यंत मुदत देण्यात आली आहे. त्यानंतर 11 डिसेंबर रोजी अंतिम उमेदवारांची यादी जाहीर होईल आणि मतदान चिन्हांचे वाटप केले जाईल. प्रत्यक्ष मतदानाची प्रक्रिया 20 डिसेंबर रोजी होईल, तर मतमोजणी 21 डिसेंबर रोजी घेतली जाईल.
