पुणे: आजारी वडिलांची तपासणी (Pune Crime) करण्यासाठी होम व्हिजिटला (Pune News) बोलावून दोन चोरट्यांनी डॉक्टरांवर चाकूचा धाक दाखवत मारहाण करून लूट केल्याची धक्कादायक घटना समोर आली आहे. ही घटना पुणे-सातारा रोडवरील अथर्व फरिहाज बिल्डिंगच्या पार्किंगमध्ये 31 डिसेंबर 2025 रोजी रात्री सव्वा 9 वाजण्याच्या सुमारास घडली. (Latest Marathi News)
याप्रकरणी धनकवडी परिसरात राहणाऱ्या 49 वर्षीय डॉक्टरांनी सहकारनगर पोलीस ठाण्यात फिर्याद दिली आहे. त्यानुसार पोलिसांनी दोन अज्ञात चोरट्यांविरोधात जबरी चोरीचा गुन्हा दाखल केला आहे. फिर्यादी डॉक्टर हे एमबीबीएस असून धनकवडी येथे त्यांचे क्लिनिक आहे. ते रुग्णांसाठी होम व्हिजिटही करतात.
पोलिसांनी दिलेल्या माहितीनुसार, डॉक्टरांना एका व्यक्तीने फोन करून वडील आजारी असल्याचे सांगितले आणि पुणे-सातारा रोडवरील अथर्व फरिहाज बिल्डिंगमध्ये तपासणीसाठी येण्यास सांगितले. डॉक्टर रात्री ठरलेल्या वेळेत इमारतीच्या पार्किंगमध्ये पोहोचले असता दोन व्यक्ती तिथे उपस्थित होत्या. त्यापैकी एकाने डॉक्टरांच्या गळ्याला चाकू लावून धमकी दिली आणि डाव्या हाताच्या बोटाला चाकू मारून जखमी केले. दुसऱ्या आरोपीने डॉक्टरांची मोपेड, मोबाईल सॅक आणि सॅकमधील 30 हजार रुपये रोख रक्कम तसेच सुमारे 1 लाख रुपये किमतीचा 700 ग्रॅम वजनाचा चांदीचा जग जबरदस्तीने चोरून नेला.
प्राथमिक तपासात चोरट्यांनी जस्ट डायलवरून होम व्हिजिटसाठी उपलब्ध असलेल्या डॉक्टरांची माहिती घेतली असावी, असा अंदाज पोलिसांनी व्यक्त केला आहे. त्यानंतर त्यांनी घटनास्थळाची पाहणी करून डॉक्टरांना होम व्हिजिटसाठी बोलावून लूट केल्याची शक्यता आहे. संबंधित ठिकाणी सीसीटीव्ही कॅमेरे असले तरी परिसरात अंधार असल्याने फुटेजमध्ये फारसे स्पष्ट दिसत नसल्याचे पोलिसांनी सांगितले. या प्रकरणाचा पुढील तपास पोलीस उपनिरीक्षक सद्दाम फकीर करीत असून, आरोपींचा शोध सुरू आहे.
