Pune Crime : पुणे : पुणे शहरातील आंबेगाव परिसरात झालेल्या घरफोडी प्रकरणात आंबेगाव पोलिसांनी एका आरोपीला अटक केली असून या कारवाईमुळे आणखी तीन गुन्हे उघडकीस आले आहेत. चितळे बंधू मिठाईच्या दुकानात झालेल्या चोरीप्रकरणी ही कारवाई करण्यात आली आहे. पोलिसांनी आरोपींकडून चोरीसाठी वापरलेली ऑटोरिक्षा, एक मोटारसायकल आणि 1,24,600 रुपयांची रोख रक्कम जप्त केली आहे.
ही चोरी 25 जानेवारी 2026 रोजी रात्री 10.15 ते 26 जानेवारी 2026 रोजी सकाळी 7.45 या कालावधीत घडली होती. नांदेड रोड, आंबेगाव परिसरातील दत्तनगर येथील विंडसर काउंटी सोसायटीमध्ये असलेल्या वेद फूडच्या चितळे बंधू मिठाई दुकान क्रमांक 14 आणि 15 येथे अज्ञात चोरट्यांनी शटर तोडून दुकानात प्रवेश केला होता. दुकानातील रोख रक्कम आणि साहित्य चोरून नेण्यात आले होते.
या प्रकरणी दुकान मालकाने आंबेगाव पोलीस ठाण्यात तक्रार दाखल केली होती. तक्रारीच्या आधारे पोलिसांनी भारतीय न्याय संहिता 2023 अंतर्गत संबंधित कलमानुसार गुन्हा नोंदवला. त्यानंतर तपास सुरू करण्यात आला. गुन्हे शोध पथकाने परिसरातील सीसीटीव्ही फुटेज तपासले तसेच गोपनीय माहितीच्या आधारे संशयितांवर लक्ष ठेवले.
तपासादरम्यान पोलिसांनी सापळा रचून ओंकार मारुती डेडे, वय 21 वर्षे, व्यवसाय क्लीनर, राहणार किरकटवाडी, धायरी, पुणे याला एका अल्पवयीन मुलासह ताब्यात घेतले. चौकशीत आरोपीने चोरीची कबुली दिली. पुढील तपासात आरोपीचा आंबेगाव आणि विमाननगर पोलीस ठाण्यात दाखल असलेल्या आणखी तीन गुन्ह्यांमध्ये सहभाग असल्याचेही निष्पन्न झाले आहे.
पोलिसांनी आरोपींकडून चोरीसाठी वापरलेली ऑटोरिक्षा, एक मोटारसायकल आणि रोख रक्कम जप्त केली असून पुढील तपास सुरू आहे.
