Pune Crime : पुणे : पुणे रेल्वे स्थानकावर (Pune Railway Station) माणुसकीला काळिमा फासणारी एक अत्यंत धक्कादायक घटना समोर आली आहे. आपल्या गावी जाण्यासाठी रेल्वेच्या प्रतीक्षेत फलाटावर झोपलेल्या एका कामगार कुटुंबातील चार वर्षांच्या चिमुकलीचे अपहरण (Kidnapping) करून तिच्यावर अत्याचार (Torture) करण्यात आला आहे. ही घटना मंगळवारी मध्यरात्री दीडच्या सुमारास फलाट क्रमांक तीनवर घडली. या प्रकरणी पुणे लोहमार्ग पोलीस आणि रेल्वे सुरक्षा दलाने सीसीटीव्हीच्या (CCTV) मदतीने अवघ्या काही तासांत आरोपीला बेड्या ठोकल्या असून पीडित मुलीची सुटका केली आहे. Pune Crime
मिळालेल्या माहितीनुसार, पीडित मुलीचे कुटुंब मूळचे मध्य प्रदेशातील असून ते मोलमजुरी करून आपला उदरनिर्वाह करतात. हे कुटुंब मध्य प्रदेशातील खांडवा येथे जाण्यासाठी पुणे रेल्वे स्थानकावर आले होते. रात्रीचे जेवण झाल्यानंतर रेल्वेची वाट पाहत हे सर्वजण फलाटावरच झोपले होते. मध्यरात्री दीडच्या सुमारास मुलीचे वडील अचानक जागे झाले तेव्हा त्यांना आपली मुलगी शेजारी दिसली नाही. त्यांनी तातडीने आजूबाजूला आणि संपूर्ण स्थानकावर शोध घेतला, मात्र मुलगी कोठेही मिळून आली नाही. अखेर त्यांनी रेल्वे पोलिसांकडे धाव घेतली.
घटना सीसीटीव्हीत कैद
घटनेचे गांभीर्य ओळखून पोलिसांनी तातडीने रेल्वे स्थानकावरील सीसीटीव्ही चित्रीकरण तपासले. त्यामध्ये एक तरुण त्या चिमुकलीचा हात धरून तिला फलाटाच्या शेवटच्या टोकाला निर्जन ठिकाणी घेऊन जाताना स्पष्ट दिसला. पोलिसांनी तातडीने शोधमोहीम राबवून सकाळी सहाच्या सुमारास पार्सल गेट जवळून आरोपीला ताब्यात घेतले. अटक करण्यात आलेल्या आरोपीचे नाव महेश यादव असून त्याचे वय (25) आहे. तो मूळचा मध्य प्रदेशातील बालाघाट येथील रहिवासी असून पीडित कुटुंबाशी त्याची आधीपासून ओळख होती, असे तपासात समोर आले आहे.
खाऊचे आमिष दाखवून मुलीचे अपहरण
आरोपीने खाऊचे आमिष दाखवून मुलीला सोबत नेले आणि तिच्यावर अत्याचार केला. मुलीच्या कपड्यांवर रक्ताचे डाग आढळले असून तिला पोटात दुखत असल्याने उपचारासाठी तातडीने रुग्णालयात दाखल करण्यात आले आहे. वैद्यकीय तपासणीत अत्याचार झाल्याचे स्पष्ट झाले असून पोलिसांनी आरोपीवर बलात्कार, अपहरण आणि पोक्सो कायद्यांतर्गत गुन्हा दाखल केला आहे.
