पुणे: पुण्यातील धानोरी परिसरात पहाटेच्या (Pune Crime) सुमारास घडलेल्या स्फोट आणि आगीच्या घटनेमुळे सोसायटीतील रहिवाशांमध्ये एकच खळबळ उडाली. एका तरुणाने जुन्या वादातून सोसायटीतील वाहने पेटवून दिल्याचा प्रकार समोर आला असून या प्रकरणी विश्रांतवाडी पोलिसांनी आरोपीला अटक केली आहे. विशाल राजेश खलसे (वय 19, रा. परांडेनगर, धानोरी) असे अटक करण्यात आलेल्या आरोपीचे नाव आहे. (Latest Marathi News)
मिळालेल्या माहितीनुसार, 13 मार्च रोजी पहाटे सुमारे 4 वाजण्याच्या सुमारास धानोरी रोडवरील ‘प्रियांश अपार्टमेंट’च्या आवारात ही घटना घडली. सोसायटीतील तळमजल्याच्या पार्किंग परिसरातून अचानक मोठे आवाज आणि धुराचे लोट उठू लागल्याने रहिवासी घाबरून घराबाहेर धावले. पार्किंगमध्ये उभ्या असलेल्या वाहनांना आग लागल्याचे पाहून परिसरात भीतीचे वातावरण निर्माण झाले.
घटनेची माहिती मिळताच अग्निशमन दलाला पाचारण करण्यात आले. अग्निशमन दलाच्या जवानांनी तातडीने घटनास्थळी पोहोचून पाण्याचा मारा करत आग आटोक्यात आणली. मात्र तोपर्यंत आगीने मोठे नुकसान केले होते. या घटनेत एकूण सहा वाहने जळून खाक झाली असून सोसायटीतील वीज वाहिन्या आणि इतर मालमत्तेचेही नुकसान झाले आहे.
या प्रकरणी सोसायटीतील एका तरुणाने दिलेल्या तक्रारीच्या आधारे पोलिसांनी तपास सुरू केला. संशयाच्या आधारे विशाल खलसे याला ताब्यात घेण्यात आले. चौकशीदरम्यान सुरुवातीला त्याने पोलिसांची दिशाभूल करण्याचा प्रयत्न केला, मात्र पुढील चौकशीत त्याने तक्रारदार तरुणासोबत असलेल्या जुन्या वादातून हे कृत्य केल्याची कबुली दिली.
सोसायटीतील नागरिकांच्या मालमत्तेचे नुकसान करून परिसरात दहशत निर्माण करण्याचा प्रयत्न केल्याप्रकरणी आरोपीविरुद्ध कठोर कारवाई करण्यात येत आहे. या प्रकरणाचा पुढील तपास पोलीस उपनिरीक्षक पद्मराज गंपले करत आहेत.
