पुणे : बाणेर-पाषाण लिंक रोडवरील एका नामांकित इमारतीत सुरू असलेल्या स्पा सेंटरच्या आड सुरू असलेल्या कथित बेकायदेशीर व्यवसायाचा बाणेर पोलिसांनी पर्दाफाश केला आहे. या कारवाईत तीन महिलांची सुटका करण्यात आली असून स्पा सेंटरचा मालक, व्यवस्थापक आणि जागामालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पाषाण परिसरातील ‘द कॅपिटल’ इमारतीमध्ये ‘ग्रीनलिफ स्पा’ या नावाने स्पा सेंटर सुरू होते. या ठिकाणी मसाजच्या नावाखाली महिलांकडून पैशांचे आमिष दाखवून कथित वेश्याव्यवसाय करून घेतला जात असल्याची गोपनीय माहिती पोलिसांना मिळाली होती. त्यानंतर बाणेर पोलिसांनी बनावट ग्राहकाच्या माध्यमातून सापळा रचत स्पा सेंटरवर छापा टाकला.
या कारवाईदरम्यान स्पा सेंटरमध्ये तीन महिलांकडून बेकायदेशीर व्यवसाय सुरू असल्याचे प्राथमिक तपासात समोर आले. पोलिसांनी तिन्ही महिलांची सुटका करून त्यांना आवश्यक ती मदत उपलब्ध करून दिली. तसेच या प्रकरणात स्पा सेंटरचा मालक, व्यवस्थापक आणि संबंधित जागा भाड्याने देणाऱ्या मालकाविरुद्ध गुन्हा दाखल करण्यात आला आहे.
उच्चभ्रू आणि आयटी कंपन्यांच्या परिसरालगत असलेल्या बाणेर-पाषाण लिंक रोडवरील नामांकित इमारतीत हा प्रकार सुरू असल्याचे समोर आल्याने परिसरात खळबळ उडाली आहे. या प्रकरणातील आरोपींची भूमिका, या व्यवसायाचे जाळे किती मोठे आहे आणि यामध्ये आणखी कोणी सहभागी आहे का, याचा तपास पोलीस करत आहेत. दरम्यान, स्पा सेंटरच्या नावाखाली बेकायदेशीर व्यवसाय करणाऱ्यांविरोधात पुढील काळातही कठोर कारवाई सुरू राहील, असा इशारा पोलिसांनी दिला आहे.
