पुणे : जन्मदात्या आईनेच आपल्या अल्पवयीन मुलीला देहविक्रीच्या व्यवसायात ढकलल्याचा धक्कादायक प्रकार पुण्यातील सहकारनगर परिसरात उघडकीस आला आहे. या प्रकरणी अनैतिक मानवी वाहतूक प्रतिबंधक कक्षाने एका सदनिकेवर छापा टाकून मुलीची सुटका केली. तसेच मुलीकडून देहविक्री करवून घेतल्याच्या आरोपावरून तिच्या आईला अटक करण्यात आली आहे.
पोलिसांनी दिलेल्या माहितीनुसार, सहकारनगर परिसरातील एका सोसायटीत अल्पवयीन मुलीकडून तिची आई देहविक्री करवून घेत असल्याची माहिती अनैतिक मानवी वाहतूक प्रतिबंधक कक्षाला मिळाली होती. या माहितीची खातरजमा करण्यासाठी पोलिसांनी सोमवारी, १२ ऑक्टोबर रोजी बनावट ग्राहक पाठवला.
मिळालेल्या माहितीची खात्री झाल्यानंतर पोलिसांच्या पथकाने संबंधित सदनिकेवर छापा टाकला. या कारवाईत अल्पवयीन मुलीची सुटका करण्यात आली. त्यानंतर मुलीकडून देहविक्री करवून घेतल्याच्या आरोपावरून महिलेला ताब्यात घेऊन अटक करण्यात आली.
या प्रकरणी सहकारनगर पोलीस ठाण्यात गुन्हा दाखल करण्यात आला आहे. अल्पवयीन मुलीचे शोषण नेमके किती काळापासून सुरू होते आणि या प्रकरणात अन्य कोणी सहभागी आहे का, याबाबत पोलीस तपास करत आहेत.
ही कारवाई पोलीस उपायुक्त पी. आर. पाटील आणि सहायक पोलीस आयुक्त शंकर खटके यांच्या मार्गदर्शनाखाली वरिष्ठ पोलीस निरीक्षक आशालता खापरे व त्यांच्या पथकाने केली.
