पुणे : कारचा टायर फुटल्याने झालेल्या अपघातानंतर एका २१ वर्षीय तरुणीला तिचे करिअर उद्ध्वस्त करण्याची धमकी देऊन ५० हजार रुपये उकळल्याचा प्रकार पुण्यात समोर आला आहे. अपघाताच्या भरपाईच्या नावाखाली तरुणीवर दबाव आणून तिच्याकडून ऑनलाइन पैसे घेतल्याचा आरोप आहे. या प्रकरणी मयूर राजेंद्र रंगदळे (रा. नांदेड सिटी, सिंहगड रस्ता) याच्याविरुद्ध स्वारगेट पोलीस ठाण्यात गुन्हा दाखल करण्यात आला आहे.
पोलिसांकडे दाखल तक्रारीनुसार, संबंधित तरुणी १५ ऑक्टोबर रोजी रात्री सव्वाअकराच्या सुमारास कारने घरी जात होती. निलायम पुलाच्या आधी स्वामी समर्थ मंदिरासमोर तिच्या कारचा पुढील उजव्या बाजूचा टायर अचानक फुटला. त्यामुळे कारवरील तिचे नियंत्रण सुटले. याच वेळी मागून येणाऱ्या लाल रंगाच्या कारने तिच्या कारला धडक दिली.
अपघातानंतर या घटनेवरून वाद निर्माण झाला. संबंधित कारचालकाने सुरक्षित अंतर न ठेवल्याचा आणि वाहतुकीच्या नियमांचे उल्लंघन केल्याचा आरोप तरुणीने केला आहे.
अपघाताच्या दुसऱ्या दिवशी, १६ ऑक्टोबर रोजी सकाळी साडेसातच्या सुमारास स्वारगेट मेट्रो स्थानकाजवळ आरोपी मयूर रंगदळे याने तरुणीला अडवले, असा आरोप आहे. अपघाताच्या भरपाईची मागणी करत त्याने तरुणीवर दबाव आणला आणि तिचे करिअर संपवून टाकण्याची धमकी दिल्याचे तक्रारीत नमूद आहे.
या धमकीमुळे घाबरलेल्या तरुणीने आरोपीला घटनास्थळीच ऑनलाइन ५० हजार रुपये पाठवले. मात्र, आपल्यावर दबाव आणून पैसे घेतल्याचे लक्षात आल्यानंतर तिने स्वारगेट पोलीस ठाण्यात तक्रार दाखल केली.
तरुणीच्या तक्रारीनंतर पोलिसांनी मयूर रंगदळे याच्याविरुद्ध गुन्हा दाखल केला आहे. अपघाताची परिस्थिती, पैशांच्या व्यवहाराचे तपशील आणि धमकीच्या आरोपांची पोलीस पडताळणी करत आहेत. या प्रकरणाचा पुढील तपास सुरू आहे.
