पुणे : दिवाळीच्या सणाला सुरुवात झाली असून, नोकरी किंवा व्यवसायानिमित्त पुण्यात राहणारे अनेकजण सणासाठी आपल्या मूळ गावी रवाना होत आहेत. मात्र, गावी जाताना सोशल मीडियावर प्रवासाचे फोटो आणि स्टेटस शेअर करण्याची सवय महागात पडू शकते. सणासुदीच्या काळात घरफोडीच्या घटनांचा धोका वाढत असल्याने चोरटे बंद घरांना लक्ष्य करण्याची शक्यता असते. त्यामुळे घराला कुलूप लावून बाहेर पडताना केवळ घराची सुरक्षा नव्हे, तर सोशल मीडियावर शेअर होणाऱ्या माहितीबाबतही सतर्क राहणे गरजेचे आहे.
फेसबुक, इंस्टाग्राम आणि व्हॉट्सॲप यांसारख्या सोशल मीडिया प्लॅटफॉर्मवर प्रवासाचे फोटो, व्हिडिओ आणि अपडेट्स शेअर करण्याची अनेकांना आवड असते. मात्र, प्रत्येक गोष्ट सार्वजनिक करण्याची गरज नाही. सार्वजनिक प्रोफाईलवरील पोस्ट अनोळखी व्यक्तींपर्यंतही पोहोचू शकतात.
प्रवासाला निघाल्याची माहिती, घराचा पत्ता, परिसराची ओळख किंवा घराच्या सुरक्षेशी संबंधित तपशील उघड करणारे फोटो शेअर करणे टाळावे. शक्यतो प्रवासाचे फोटो आणि व्हिडिओ घरी परतल्यानंतर पोस्ट करणे अधिक सुरक्षित ठरू शकते.
‘वे टू भुर्र’, ‘गोवा डायरीज’, ‘मुंबई कॉलिंग’ अशा स्टेटस आणि पोस्ट अनेकदा पाहायला मिळतात. मात्र, अशा पोस्टमधून व्यक्ती कुठे जात आहे, किती दिवस घराबाहेर राहणार आहे आणि घरात कोणी आहे की नाही, याचा अंदाज अनोळखी व्यक्तींना येऊ शकतो.
त्यामुळे दिवाळीच्या सुट्टीत बाहेरगावी जाताना प्रवासाचे नियोजन आणि घर रिकामे असल्याची माहिती सोशल मीडियावर शेअर करणे टाळा. थोडीशी सावधगिरी बाळगल्यास संभाव्य घरफोडीचा धोका कमी करता येऊ शकतो. सणाचा आनंद लुटताना घराच्या सुरक्षेकडे दुर्लक्ष करू नका.
