पुणे: काँग्रेस प्रदेशाध्यक्ष हर्षवर्धन सपकाळ (Harshwardhan Sapkal) यांनी टिपू सुलतान यांची तुलना छत्रपती शिवाजी महाराज यांच्याशी केल्याच्या पार्श्वभूमीवर पुण्यातील काँग्रेस भवनासमोर रविवारी भाजपकडून जोरदार आंदोलन करण्यात आले. या आंदोलनादरम्यान दोन्ही पक्षांच्या कार्यकर्त्यांमध्ये झटापट झाल्याने काही काळ तणावाचे वातावरण निर्माण झाले. (Breaking News)
दुपारी सुमारे १२ वाजता सुरू झालेल्या या आंदोलनात भाजपचे शेकडो कार्यकर्ते काँग्रेस भवनासमोर जमा झाले. सपकाळ यांच्या वक्तव्याचा निषेध करत घोषणाबाजी करण्यात आली. काही कार्यकर्त्यांनी सपकाळ यांच्या प्रतिमेला जोडे मारत संताप व्यक्त केला.
आंदोलन आक्रमक होत असताना काही कार्यकर्त्यांनी काँग्रेस भवनात प्रवेश करण्याचा प्रयत्न केल्याचा आरोप आहे. पोलिसांनी तत्काळ हस्तक्षेप करून त्यांना रोखले. मोठ्या प्रमाणावर पोलीस बंदोबस्त तैनात करण्यात आला होता, त्यामुळे परिस्थिती नियंत्रणाबाहेर जाणे टळले.
दरम्यान काँग्रेसचे कार्यकर्तेही आक्रमक झाल्याने दोन्ही बाजूंचे पदाधिकारी एकमेकांसमोर आले. झटापटीदरम्यान ढकलाढकली झाली. भाजप कार्यकर्त्यांकडून दगडफेक झाल्याचा आरोप काँग्रेसने केला आहे. या दगडफेकीत एक-दोन काँग्रेस कार्यकर्ते जखमी झाल्याचे सांगितले जात आहे.
काँग्रेस नेते मोहन जोशी आणि प्रशांत जगताप यांनी या आंदोलनाचा निषेध करत कारवाईची मागणी केली आहे. काँग्रेस कार्यकर्त्यांनी दावा केला की काही जण टेम्पोभर दगड घेऊन आले होते.
फरासखाना पोलीस ठाण्यासमोर बसून आंदोलन करण्याचा इशारा देत काँग्रेस कार्यकर्त्यांनी धीरज घाटे आणि महापौरांवर गुन्हा दाखल करण्याची मागणी केली आहे. “जोपर्यंत गुन्हा दाखल होत नाही, तोपर्यंत आम्ही शांत बसणार नाही,” असा इशारा देण्यात आला आहे.
या घटनेमुळे पुण्यातील राजकीय वातावरण पुन्हा तापले आहे. संबंधित वक्तव्य, आंदोलनातील हिंसाचाराचे आरोप आणि पोलिसांची पुढील कारवाई याकडे सर्वांचे लक्ष लागले आहे. दोन्ही बाजूंनी परस्परांवर गंभीर आरोप केले असून पोलिसांकडून घटनेची नोंद घेऊन पुढील तपास सुरू असल्याची माहिती मिळते आहे.
