पुणे : अन्न व औषध प्रशासनाचे आयुक्त तुकाराम मुंढे यांच्याशी जवळचे संबंध असल्याचे सांगून शासकीय कामे करून देण्याचे आमिष दाखवणाऱ्या एका डॉक्टरविरुद्ध कोरेगाव पार्क पोलीस ठाण्यात गुन्हा दाखल करण्यात आला आहे. आयुक्तांच्या नावाचा आणि पदाचा गैरवापर केल्याप्रकरणी अन्न व औषध प्रशासनाने अधिकृत तक्रार दिल्यानंतर ही कारवाई करण्यात आली. गुन्हा दाखल झालेल्या डॉक्टरचे नाव डॉ. हिमांशू अजवाणी (वय ४८, रा. पुणे) असे आहे.
पोलिसांनी दिलेल्या माहितीनुसार, डॉ. अजवाणी यांनी एका व्हॉट्सॲप ग्रुपवर संदेश पाठवून स्वतःचा उल्लेख “अन्न व औषध प्रशासनाचे आयुक्त तुकाराम मुंढे यांचा डॉक्टर” असा केला होता. तसेच आयुक्तांशी अत्यंत जवळचे संबंध असल्याचा दावा करत त्यांच्या ओळखीच्या माध्यमातून कोणतीही शासकीय कामे करून देऊ शकतो, असेही त्यांनी या संदेशात म्हटल्याचा आरोप आहे.
सदर संदेश सोशल मीडियासह विविध व्हॉट्सॲप ग्रुपवर मोठ्या प्रमाणात व्हायरल झाला. ही बाब अन्न व औषध प्रशासनाच्या वरिष्ठ अधिकाऱ्यांच्या निदर्शनास आल्यानंतर त्यांनी त्याची गंभीर दखल घेतली. अधिकाऱ्यांच्या मते, आयुक्त तुकाराम मुंढे यांच्या नावाचा अशा प्रकारे वापर केल्यामुळे विभागाची प्रतिमा आणि प्रशासनावरील विश्वास प्रभावित होण्याची शक्यता होती.
यानंतर अन्न व औषध प्रशासनाने तातडीने पुणे पोलिसांकडे अधिकृत तक्रार दाखल केली. या तक्रारीच्या आधारे कोरेगाव पार्क पोलीस ठाण्यात डॉ. हिमांशू अजवाणी यांच्याविरुद्ध गुन्हा नोंदविण्यात आला आहे.
या प्रकरणाचा पुढील तपास पोलीस करत असून, संबंधित संदेशाचा उद्देश काय होता, त्याद्वारे कोणाची फसवणूक करण्याचा प्रयत्न झाला होता का आणि अशा प्रकारचे संदेश अन्य ठिकाणीही पाठविण्यात आले होते का, याचा तपास केला जात आहे.
