गुजरात: गुजरात दहशतवादविरोधी पथकाने (ATS) मोठी कारवाई करत जैश-ए-मोहम्मद या दहशतवादी संघटनेशी कथित संबंध असलेल्या पाच संशयितांना ताब्यात घेतले आहे. ही कारवाई उत्तर गुजरातमधील सिद्धपूर आणि आसपासच्या भागात करण्यात आली. यापूर्वी या प्रकरणात आठ जणांना अटक करण्यात आली होती. त्यांच्या चौकशीतून मिळालेल्या माहितीच्या आधारे ही पुढील कारवाई करण्यात आल्याचे अधिकाऱ्यांनी सांगितले.
ताब्यात घेण्यात आलेल्यांमध्ये बिलाल आबिद शेरा, मोहम्मद अयुब काडीवाल, मोहम्मद शफी मुखी, मोहम्मद हसन करडीया आणि मोहम्मद अयुब सुनासरा यांचा समावेश आहे. तपास यंत्रणांच्या माहितीनुसार, हे संशयित देशात साखळी बॉम्बस्फोट घडवून आणणार होते. यापैकी मोहम्मद अयुब आणि बिलाल आबिद शेरा हे या गटाचे प्रमुख सदस्य असल्याचे प्राथमिक तपासात समोर आले आहे.
तपासादरम्यान संशयितांकडून स्फोटके तयार करण्यासाठी वापरली जाणारी रसायने आणि गनपावडर जमा केल्याची माहिती समोर आली आहे. तसेच, प्रत्यक्ष हल्ल्यापूर्वी त्यांनी स्फोटांच्या चाचण्याही केल्या होत्या. दरम्यान, या प्रकरणाचा अधिक तपास सुरू असून संशयितांचे इतर कोणाशी संबंध आहेत का, याचाही शोध घेतला जात आहे. या घटनेनंतर गुजरातसह देशातील सुरक्षा यंत्रणा अधिक सतर्क झाल्या आहेत.
