पुणे: लोहगड किल्ल्यावर केतन अग्रवाल यांच्या हत्येप्रकरणी अटक करण्यात आलेली सिया गोयल आणि तिचा साथीदार चेतन चौधरी यांनी गुप्तपणे विवाह केल्याचा दावा समोर आला आहे. या दाव्याची सत्यता तपासण्यासाठी पुणे ग्रामीण पोलीस सध्या डिजिटल पुरावे आणि इतर माहितीची पडताळणी करत आहेत.
पोलिसांच्या माहितीनुसार, चौकशीदरम्यान सिया आणि चेतन यांनी केतन अग्रवाल यांच्या हत्येच्या काही महिन्यांपूर्वीच आपण गुप्तपणे विवाह केल्याचा दावा केला आहे. या दाव्याच्या अनुषंगाने दोघांच्या मोबाईलमधील व्हॉट्सअॅप चॅट, छायाचित्रे आणि इतर डिजिटल नोंदींची तपासणी सुरू आहे.
तपासादरम्यान समोर आलेल्या माहितीनुसार, एका लॉजमध्ये दोघांनी प्रतीकात्मक विवाह केल्याचा दावा करण्यात आला आहे. या वेळी चेतनने सियाच्या कपाळात कुंकू भरल्याचेही तपासात समोर आले आहे. मात्र, या घटनेला कायदेशीर विवाहाचा दर्जा मिळतो का, याबाबत पोलीस अधिक माहिती गोळा करत आहेत.
सिया आणि चेतन यांनी कथित विवाह नेमका कुठे केला, तसेच तो केतन अग्रवाल यांच्याशी सियाचा १९ फेब्रुवारी रोजी झालेला साखरपुडा होण्यापूर्वी झाला होता की त्यानंतर, याचाही तपास सुरू आहे.
दरम्यान, पुणे ग्रामीणचे पोलीस अधीक्षक संदीपसिंग गिल यांनी माध्यमांशी बोलताना, सिया आणि चेतन यांच्या विवाहाच्या दाव्याला सध्या कोणताही अधिकृत कागदोपत्री पुरावा उपलब्ध नसल्याचे स्पष्ट केले आहे. विवाह प्रमाणपत्र किंवा अन्य कायदेशीर कागदपत्र अद्याप पोलिसांच्या हाती लागलेले नाही.
या प्रकरणात डिजिटल पुरावे, मोबाईलमधील माहिती आणि इतर साक्षीदारांच्या जबाबांच्या आधारे पुढील तपास सुरू असून, कथित विवाहाबाबतचा दावा कितपत खरा आहे, हे तपास पूर्ण झाल्यानंतरच स्पष्ट होणार आहे.
