पुणे: बारामती येथे 28 जानेवारी रोजी घडलेल्या लिअरजेट 45 विमान अपघातानंतर (Ajit Pawar Plane Crash) राजकीय आणि तांत्रिक वाद अधिक तीव्र झाला आहे. या दुर्घटनेत राष्ट्रवादीचे दिवंगत नेते अजित पवार यांचे निधन (Ajit Pawar Death) झाले. अपघात की घातपात, याबाबत संशय व्यक्त करत आमदार रोहित पवार यांनी मुंबई व दिल्ली येथे पत्रकार परिषद घेत गंभीर आरोप केले. संबंधित VSR व्हेंचर्स प्रायव्हेट लिमिटेड या कंपनीच्या कामकाजावर प्रश्नचिन्ह उपस्थित करत त्यांनी अनेक तांत्रिक बाबी मांडल्या. (Rohit Pawar)
या पार्श्वभूमीवर नागरी विमान वाहतूक महासंचालनालय अर्थात DGCA ने विशेष सुरक्षा ऑडिट केले. ऑडिटमध्ये हवाई योग्यता, उड्डाण सुरक्षितता आणि ऑपरेशन्स संदर्भात त्रुटी आढळल्याचे सांगण्यात आले. त्यानंतर कंपनीच्या लिअरजेट 40/45 प्रकारातील विमानांचे उड्डाण तात्पुरते बंद करण्यात आले आहे. संबंधित विमानांना तात्काळ ग्राउंड करून कमतरता अहवाल सादर करण्याचे निर्देश देण्यात आले आहेत.
रोहित पवार यांनी ट्रान्सपॉन्डर शेवटच्या मिनिटांत बंद होणे, अतिरिक्त इंधन टाक्या बसविल्याचा संशय, स्टॉल वॉर्निंग सिस्टिम कार्यरत नसणे, टेकलॉग आणि एअरवर्दीनेस अहवालातील अस्पष्टता अशा अनेक मुद्द्यांवर चौकशीची मागणी केली आहे. यापूर्वी 14 सप्टेंबर 2023 रोजी मुंबईत या कंपनीच्या लिअरजेट 45 XR विमानाचा अपघात झाला होता. त्या घटनेचा अंतिम अहवाल जाहीर झाला नसल्याचाही आरोप करण्यात आला आहे.
आंतरराष्ट्रीय पातळीवर युरोपियन युनियन एव्हिएशन सेफ्टी एजन्सीने कंपनीविरुद्ध कारवाई करत TCO परवाना स्थगित केल्याची माहितीही समोर आली आहे. फ्लाइट ड्युटी टाइम लिमिटेशनचे उल्लंघन, कॉकपिट व्हॉइस रेकॉर्डर कार्यरत नसणे, एसओपीचे पालन न करणे आणि देखभालीतील त्रुटी यांसारखे आरोप करण्यात आले आहेत.
सध्या DGCA च्या पुढील तपासाकडे सर्वांचे लक्ष लागले आहे. तांत्रिक बिघाड, देखभाल प्रक्रियेतील त्रुटी की अन्य कारण, हे अधिकृत चौकशीतूनच स्पष्ट होणार आहे. या प्रकरणाने खासगी विमान वाहतूक क्षेत्रातील सुरक्षा मानकांवर गंभीर प्रश्न उपस्थित केले आहेत.
