पुणे: दिवंगत उपमुख्यमंत्री अजित पवार यांच्या विमान (Ajit Pawar Plane Crash) अपघाताबाबत सुरू असलेल्या चर्चेला आता नवे वळण मिळाले आहे. राष्ट्रवादी काँग्रेसचे आमदार अमोल मिटकरी (Amol Mitkari) यांनी नाशिकमधील भोंदू म्हणून ओळखल्या जाणाऱ्या अशोक खरात याचा या अपघाताशी काही संबंध आहे का, याची चौकशी करण्याची मागणी केली आहे. (Ashok Kharat)
अजित पवार यांच्या अपघातानंतर सुरुवातीपासूनच विविध शंका उपस्थित होत आहेत. विमान कंपनी, तांत्रिक बिघाड आणि संभाव्य घातपात या सर्व अँगलने तपास व्हावा, अशी मागणी आधीपासून होत आहे. त्यातच आता अशोक खरात प्रकरण समोर आल्यानंतर या चर्चेला आणखी धार आली आहे.
अमोल मिटकरी यांनी सोशल मीडियावर काही फोटो शेअर करत दावा केला आहे की, अशोक खरात हा संबंधित विमान कंपनीच्या पायलटसोबत आणि विमानासमोर दिसत आहे. यामुळे दोघांमध्ये काही संबंध होते का, याबाबत संशय व्यक्त केला जात आहे. तसेच काही ठिकाणी जादूटोणा करण्याचे प्रयत्न झाल्याच्या चर्चाही पुढे आल्या असून, त्याचा या प्रकरणाशी काही संबंध आहे का, असा सवालही उपस्थित केला जात आहे.
मिटकरी यांनी स्पष्ट केले की, अशा अंधश्रद्धांवर त्यांचा किंवा अजित पवारांचा विश्वास नव्हता. मात्र, जर या सर्व घटनांमध्ये काही दुवे असतील आणि ते विमान कंपनीपर्यंत पोहोचत असतील, तर संपूर्ण प्रकरणाचा सखोल तपास होणे आवश्यक आहे.
या मागणीमुळे आधीच संवेदनशील असलेल्या या प्रकरणाला राजकीय रंग मिळण्याची शक्यता आहे. अपघातामागील नेमकी कारणे शोधण्यासाठी तपास यंत्रणांवर दबाव वाढत असून, सर्व अँगलने निष्पक्ष चौकशी होण्याची अपेक्षा व्यक्त केली जात आहे.
