लोणी काळभोर, ता. 19 : दारूच्या नशेत आलेल्या व्यक्तीने (Theur News) उपचाराचे पैसे देण्यास नकार देत डॉक्टरशी वाद घालून क्लिनिकमध्ये तोडफोड केल्याची घटना घडली आहे. ही घटना थेऊर फाटा येथील ‘श्रेया क्लिनिक’मध्ये बुधवारी (ता. 18) दुपारी सुमारे पावणे एक वाजण्याच्या सुमारास घडली आहे. या घटनेत डॉक्टर व एक रुग्ण जखमी झाले असून क्लिनिकच्या काचेच्या दरवाज्यांचे मोठे नुकसान झाले आहे.
संतोष रमेश गुंजाळ (काकडे वस्ती, थेऊर, ता. हवेली) असे गुन्हा दाखल करण्यात आलेल्या आरोपीचे नाव आहे. याबाबत डॉ. संतोष महादेव गायकवाड (वय 37) यांनी लोणी काळभोर पोलीस ठाण्यात फिर्याद दिली आहे. या घटनेमुळे थेऊरसह परिसरात एकच खळबळ उडाली आहे.
पोलिसांनी दिलेल्या माहितीनुसार, डॉ. संतोष गायकवाड हे तुपे कॉम्प्लेक्स, थेऊर फाटा येथे ‘श्रेया क्लिनिक’ चालवतात. बुधवारी डॉ. गायकवाड हे रुग्णांची तपासणी करत असताना संतोष गुंजाळ हा इसम अचानक तपासणी कक्षात आला. त्याच्या डोक्याला जखम झाल्याने डॉक्टरांनी प्रथमोपचार करून पट्टी बांधली व औषधे लिहून दिली. उपचाराचे 220 रुपये बिल मागितल्यावर संबंधित इसमाने पैसे देण्यास नकार दिला. आणि थेट डॉ. संतोष गायकवाड यांच्याशी वाद घालण्यास सुरुवात केली.
संतोष गुंजाळ याने संतापाच्या भरात क्लिनिकमधील टेबलवरील काच ढकलली तसेच डॉ. संतोष गायकवाड यांचा मोबाईल हिसकावून घेण्याचाही प्रयत्न केला. त्यानंतर संतोष गुंजाळ क्लिनिकबाहेर जाऊन रस्त्यावर पडलेले दगड उचलून क्लिनिकच्या काचेच्या दरवाज्यांवर आणि पार्टीशनवर फेकून मारत तोडफोड केली. या घटनेत क्लिनिकच्या प्रवेशद्वारासह दोन काचेचे दरवाजे फुटले.
डॉ. गायकवाड व त्यावेळी उपस्थित असलेले रुग्ण हनुमंत बळे (रा. उरुळी कांचन) हे बाहेर येत असताना आरोपीने पुन्हा दगडफेक केली. या दगडांमुळे डॉ. गायकवाड यांच्या पाठीवर व डाव्या हातावर दुखापत झाली, तर उडालेल्या काचेच्या तुकड्यांमुळे रुग्णाच्या हाताला किरकोळ जखम झाली आहे. दारूच्या नशेत असलेला आरोपी संतोष गुंजाळ हा मोठा दगड उचलताना तोल जाऊन स्वतःच्या डोक्यालाच मार लागल्याचीही माहिती पोलिसांनी दिली. घटनेनंतर डॉ. गायकवाड यांनी 112 क्रमांकावर कॉल करून पोलिसांना माहिती दिली, त्यानंतर सर्वांना पोलीस ठाण्यात नेण्यात आले.
दरम्यान, या प्रकरणी संतोष गुंजाळ याच्याविरुद्ध लोणी काळभोर पोलिस ठाण्यात भारतीय न्याय संहिता (BNS) 2023 अंतर्गत कलम 118(1), 125, 324(4), 352 तसेच महाराष्ट्र वैद्यकीय सेवा व्यक्ती व संस्थांवरील हिंसाचार प्रतिबंधक अधिनियम 2010 अंतर्गत गुन्हा दाखल केला आहे. पुढील तपास लोणी काळभोर पोलीस करत आहेत.
