Ajit Pawar Death : पुणे : राज्याचे उपमुख्यमंत्री आणि राष्ट्रवादी काँग्रेसचे अध्यक्ष अजित पवार यांचे दोन दिवसांपूर्वी भीषण विमान अपघातात निधन झाले. बारामती विमानतळाजवळ लँडिंगच्या वेळी विमान कोसळल्याने हा अपघात झाला. या दुर्घटनेत अजित पवार यांच्यासह एकूण 5 जणांचा मृत्यू झाला. या घटनेमुळे संपूर्ण महाराष्ट्रात शोककळा पसरली असून राजकीय, सामाजिक क्षेत्रातून तीव्र दुःख व्यक्त केले जात आहे.
अजित पवार हे महाराष्ट्राच्या राजकारणातील प्रभावी आणि कणखर नेतृत्व म्हणून ओळखले जात होते. त्यांच्या अचानक जाण्याने राज्याच्या राजकारणात मोठी पोकळी निर्माण झाली आहे. बारामतीपासून राजकीय वाटचाल सुरू करणाऱ्या अजित पवारांनी त्याच मातीत अखेरचा श्वास घेतला, यामुळे कार्यकर्ते आणि समर्थक भावनिक झाले आहेत.
अजित पवार यांच्यावर बारामती येथील विद्या प्रतिष्ठानच्या मैदानात शासकीय इतमामात अंत्यसंस्कार करण्यात आले. अंत्यसंस्कारावेळी शासकीय मानवंदना देण्यात आली. याच दरम्यान सलामी देताना एका कर्मचाऱ्याकडून मिसफायर झाल्याचा प्रकार घडला. हा व्हिडीओ सोशल मीडियावर व्हायरल झाल्यानंतर एकच खळबळ उडाली.
या घटनेवर स्पष्टीकरण देताना पोलिसांनी सांगितले की, शासकीय अंत्यसंस्कारावेळी वापरण्यात येणारे राऊंड हे डमी स्वरूपाचे असतात. या राऊंडमधून कोणालाही गंभीर इजा होण्याची शक्यता नसते. सलामी देताना तीन राऊंड फायर केले जातात आणि त्यावेळी ही चूक झाली. सुदैवाने या घटनेत कोणालाही इजा झाली नाही.
या वेळी केंद्रीय गृहमंत्री अमित शाह, मुख्यमंत्री देवेंद्र फडणवीस, उपमुख्यमंत्री एकनाथ शिंदे, शरद पवार यांच्यासह अनेक वरिष्ठ नेते उपस्थित होते. अजित पवार यांचे पुत्र पार्थ पवार आणि जय पवार मुखाग्नी देत असतानाच हा प्रकार घडला.
