Team India : न्यूझीलंडविरुद्धच्या पाचव्या आणि अंतिम टी-२० सामन्याआधी भारतीय क्रिकेट संघाने तिरुअनन्तपुरममध्ये आध्यात्मिक सुरुवात केली. सामना जिंकण्याच्या निर्धारासह टीम इंडियाचे खेळाडू शुक्रवारी सकाळी प्रसिद्ध श्री पद्मनाभस्वामी मंदिरात दाखल झाले आणि मनोभावे पूजा-अर्चा केली. (Team India)
कर्णधार सूर्यकुमार यादवसह अक्षर पटेल, रिंकु सिंह, वरुण चक्रवर्ती, कुलदीप यादव, रवी बिश्नोई आणि संघाचे कोच टी. दिलीप यांनी पारंपरिक पोशाखात मंदिरात प्रवेश केला. सुमारे अर्धा तास खेळाडू मंदिर परिसरात होते. सामन्याच्या तणावाआधी मिळालेला हा शांततेचा क्षण खेळाडूंच्या चेहऱ्यावर स्पष्ट दिसत होता.
न्यूझीलंडविरुद्धच्या मालिकेत भारताने सुरुवातीचे तीन सामने जिंकत वर्चस्व गाजवले आहे. चौथा सामना मात्र न्यूझीलंडने ५० धावांनी जिंकत पुनरागमन केले. त्यामुळे शनिवारी होणारा तिरुअनन्तपुरममधील सामना केवळ औपचारिक नसून प्रतिष्ठेचा आणि आत्मविश्वास वाढवणारा ठरणार आहे.
या सामन्याकडे विशेष लक्ष आहे ते संजू सॅमसनकडे. केरळचा खेळाडू असल्याने होम पिचवर तो मोठी खेळी साकारेल, अशी अपेक्षा चाहत्यांना आहे. तसेच अक्षर पटेल आणि फिरकीपटू वरुण चक्रवर्तीला अंतिम सामन्यात संधी मिळण्याचीही शक्यता वर्तवली जात आहे.
श्री पद्मनाभस्वामी मंदिर हे केवळ धार्मिकच नव्हे तर वास्तुकलेचा अद्भुत नमुना मानले जाते. जगभरात प्रसिद्ध असलेल्या या मंदिरात भारतीय संघाने सामन्याआधी केलेली प्रार्थना, ही संघाच्या मानसिक तयारीचा भाग मानली जात आहे.
आता मैदानात कोण बाजी मारतो, याकडे संपूर्ण क्रिकेटविश्वाचं लक्ष लागले आहे. देवाचा आशीर्वाद आणि मैदानावरील कामगिरी दोन्हीचा कस शनिवारी लागणार आहे.
