पुणे : पुणे शहर आणि परिसरात सार्वजनिक वाहतुकीतून प्रवास करणाऱ्या नागरिकांच्या सुरक्षेचा प्रश्न पुन्हा एकदा ऐरणीवर आला आहे. एसटी आणि पीएमपी बसमधून प्रवास करणाऱ्या दोन ज्येष्ठ महिलांचे तब्बल ९ लाख २० हजार रुपयांचे सोन्याचे दागिने चोरट्यांनी लंपास केल्याच्या घटना उघडकीस आल्या आहेत. याशिवाय, आरटीओ मेट्रो स्थानक परिसरात मध्यरात्री एका दुचाकीस्वार तरुणाला तीक्ष्ण शस्त्राचा धाक दाखवून मारहाण करण्यात आली. त्यानंतर त्याचे दोन महागडे मोबाईल लुटण्यात आले.

या तिन्ही घटनांप्रकरणी संबंधित पोलीस ठाण्यांत गुन्हे दाखल करण्यात आले आहेत. या घटनांमुळे सार्वजनिक वाहतुकीतून प्रवास करणाऱ्या नागरिकांच्या सुरक्षिततेचा प्रश्न पुन्हा चर्चेत आला आहे.
सोलापूर जिल्ह्यातील मोहोळ तालुक्यातील पापरी गावच्या रहिवासी असलेल्या एका ज्येष्ठ महिलेला एसटी बसमधून प्रवास करताना चोरट्यांनी लक्ष्य केले. मंगळवारी (१७ नोव्हेंबर) सकाळी त्या मोडनिंब ते स्वारगेट या बसमधून प्रवास करत होत्या. प्रवासादरम्यान गर्दीचा फायदा घेत अज्ञात चोरट्यांनी त्यांच्या पिशवीतील ८ लाख ७० हजार रुपये किमतीचे सोन्याचे दागिने चोरून नेले. या प्रकारानंतर संबंधित महिलेने स्वारगेट पोलीस ठाण्यात तक्रार दाखल केली असून, पोलिसांकडून पुढील तपास सुरू आहे.








