पुणे : बेकायदेशीर औषध विक्री आणि साठवणुकीविरोधात अन्न व औषध प्रशासनाने (एफडीए) कोल्हापूर आणि पुण्यात मोठी कारवाई केली आहे. या संयुक्त कारवाईत एकूण 24.87 लाख रुपये किमतीचा औषधसाठा जप्त करण्यात आला आहे.
कोल्हापूरमध्ये एका मेडिकल फर्मवर टाकलेल्या छाप्यात 13.76 लाख रुपये किमतीची अॅलोपॅथिक औषधे जप्त करण्यात आली. संबंधित औषधसाठ्यासाठी आवश्यक परवाने आणि कागदपत्रे उपलब्ध नसल्याचे तपासात आढळून आले. त्यामुळे प्रशासनाने हा साठा ताब्यात घेतला.
दरम्यान, पुण्यातील एका नामांकित औषध कंपनीच्या गोदामावरही कारवाई करण्यात आली. येथे 11.11 लाख रुपये किमतीची शेड्यूल-एच प्रकारातील औषधे जप्त करण्यात आली. या औषधांच्या जाहिरात आणि वितरण प्रक्रियेत नियमांचे उल्लंघन झाल्याचे प्राथमिक तपासात समोर आले आहे.
दोन्ही ठिकाणांहून जप्त करण्यात आलेल्या औषधांचे नमुने तपासणीसाठी प्रयोगशाळेत पाठवण्यात आले आहेत. तपास अहवाल प्राप्त झाल्यानंतर संबंधितांवर पुढील कायदेशीर कारवाई करण्यात येणार असल्याची माहिती प्रशासनाने दिली.
अन्न व औषध प्रशासनाने नागरिकांना केवळ अधिकृत आणि परवानाधारक विक्रेत्यांकडूनच औषधे खरेदी करण्याचे आवाहन केले आहे. तसेच संशयास्पद औषध विक्री, बेकायदेशीर साठा किंवा नियमबाह्य व्यवहार आढळल्यास तत्काळ प्रशासनाला माहिती देण्याचेही आवाहन करण्यात आले आहे.
सार्वजनिक आरोग्याशी संबंधित बाबींमध्ये कोणतीही तडजोड सहन केली जाणार नसून बेकायदेशीर औषध व्यवसाय करणाऱ्यांविरोधात अशाच प्रकारच्या कारवाया पुढेही सुरू राहतील, असा इशारा अन्न व औषध प्रशासनाने दिला आहे.
