पुणे : जिल्ह्यातील वकिलांची शिखर संघटना असणाऱ्या पुणे बार असोसिएशनच्या अध्यक्षपदी अॅड. केतन कोठावळे तर उपाध्यक्षपदी अॅड. विश्वजीत पाटील आणि अॅड. जयश्री चौधरी-बीडकर निवडून आले आहेत.
शिवाजीनगर न्यायालयात सोमवारी मतदान घेण्यात आले होते. त्यानंतर रात्री उशीरापर्यंत मतमोजणी सुरु होती. पुणे बार असोसिएशनच्या अध्यक्षपदासाठी अॅड. केतन कोठावळे यांनी अॅड. राहुल दिंडोकर यांच्या लढत झाली. यात अॅड. केतन कोठावळे यांनी अॅड. राहुल दिंडोकर यांच्यावर २७२८ मते घेताना १२३० मतांनी मात केली.
उपाध्यक्षपदाच्या लढतीत अॅड. विश्वजीत पाटील यांना ३ हजार १० तर, अॅड. जयश्री चौधरी -बीडकर यांना २ हजार २३४ मते मिळून ते विजयी झाले. अॅड. राहुल कदम यांना २ हजार ७१९ व अॅड. गंधर्व कवडे हे २ हजार ४९१ मते मिळवून सचिवपदी विजयी झाले. खनिजदारपदाच्या लढतीत अॅड. समीर बेलदरे यांनी २ हजार ७९१ मते मिळवत विजय मिळविला. अॅड. अजय देवकर यांची ऑडिटर म्हणून निवड झाली आहे.
बार असोसिएशनच्या कार्यकारिणी सदस्यांची यापूर्वीच बिनविरोध निवड झाली होती. त्यात अमोल वडगणे, प्रमोद नढे, मयुरी कासट, संजय खैरे, रेश्मा चौधरी, श्रद्धा जगताप, राहुल प्रभुणे, ऋषिकेश कोळपकर, चंद्रसेन कुमकर, सचिन माने अशी कार्यकारिणी सदस्यांची नावे आहेत.
अॅड. अमित गिरमे यांनी मुख्य निवडणुक अधिकारी म्हणून काम पाहिले. त्यांना अॅड. दिलीप जगताप, अॅड. माधवी पोतदार, अॅड. शरद कुलकर्णी, अॅड. कांताराम नप्ते आणि अॅड. सिद्धेश्वर चौधरी यांनी उपनिवडणुक अधिकारी म्हणून मदत केली.
