पुणे: सध्या शहरात कोविड-१९ रुग्णसंख्या तुलनेत कमी असली, तरी पुणे महापालिकेने (PMC) दक्षता म्हणून एक महत्त्वपूर्ण पाऊल उचललं आहे. शहरातील सर्व खासगी रुग्णालये आणि प्रयोगशाळांना २०२२ मध्ये निश्चित करण्यात आलेल्या कोविड चाचणी प्रोटोकॉलचे काटेकोर पालन करण्याचे स्पष्ट निर्देश देण्यात आले आहेत.
पीएमसीने म्हटलं आहे की, “कोविड चाचण्या करताना योग्य नमुना संकलन, नोंदवही प्रक्रिया, RT-PCR किंवा अँटीजन चाचणीच्या निकषांचे पालन आणि शासनास अहवाल सादर करणे – हे सर्व टप्पे अत्यंत महत्त्वाचे आहेत.”
या निर्देशांचा उद्देश म्हणजे, संभाव्य कोविड रुग्णांचं निदान अचूकपणे करणे, त्यांच्या संपर्कात आलेल्यांना वेळेत शोधून त्यावर कारवाई करणे आणि चुकीच्या चाचणीमुळे संभाव्य संसर्ग वाढू न देणे.
महानगरपालिकेच्या आरोग्य विभागाने यासंदर्भात पत्रक जारी करून खासगी संस्थांना सूचना दिल्या असून, लवकरच काही लॅब्स आणि रुग्णालयांची तपासणीही केली जाणार आहे.
सध्या रुग्णसंख्या कमी असली, तरी नवीन व्हेरियंट्समुळे धोका कायम असल्याचं आरोग्य विभागाचे म्हणणे आहे. त्यामुळे, कोणतीही बेपर्वाई होऊ नये यासाठी PMCकडून प्रतिबंधात्मक उपाययोजना सुरू करण्यात आल्या आहेत.
