पिंपरी-चिंचवड: पिंपरी-चिंचवडमधील मोरवाडी परिसरातील एका कुटुंबाच्या दुर्दैवी मृत्यूची घटना आणखी हृदयद्रावक ठरली आहे. शनिवारी बेशुद्ध अवस्थेत आढळलेल्या आई आणि मुलीचाही उपचारादरम्यान रविवारी मृत्यू झाला. यापूर्वी कुटुंबप्रमुख विनोद पिल्लाई यांचा उपचारापूर्वीच मृत्यू झाला होता. या घटनेनंतर संपूर्ण परिसरात हळहळ व्यक्त केली जात आहे.
मृतांमध्ये विनोद पिल्लाई (वय 50), त्यांची पत्नी सिल्जा पिल्लाई (वय 45) आणि मुलगी पूर्णिमा पिल्लाई (वय 19) यांचा समावेश आहे. पोलिसांनी दिलेल्या माहितीनुसार, शनिवारी सकाळी करिष्मा ग्लोरी हाउसिंग सोसायटीतील त्यांच्या घरात तिघेही बेशुद्ध अवस्थेत आढळले. त्यांना तातडीने वायसीएम रुग्णालयात दाखल करण्यात आले. मात्र, विनोद पिल्लाई यांचा उपचारापूर्वीच मृत्यू झाला, तर सिल्जा आणि पूर्णिमा यांच्यावर अतिदक्षता विभागात उपचार सुरू होते. उपचारादरम्यान रविवारी मायलेकींचीही प्राणज्योत मालवली.
प्राथमिक तपासात आर्थिक अडचणींमुळे कुटुंबाने हे टोकाचे पाऊल उचलल्याचा संशय व्यक्त करण्यात आला आहे. पोलिसांना घरातून एक चिठ्ठी मिळाली असून त्यामध्ये आर्थिक विवंचनेचा उल्लेख करण्यात आला आहे. तसेच या निर्णयासाठी कोणालाही जबाबदार धरू नये, असे त्यात नमूद असल्याची माहिती पोलिसांनी दिली.
तपासादरम्यान घरातून सोडियम नायट्रेटचा डबा जप्त करण्यात आला आहे. पोलिसांच्या माहितीनुसार, हे रसायन ऑनलाइन खरेदी करण्यात आले होते. घटनास्थळावरील साहित्य आणि इतर पुरावे ताब्यात घेऊन त्यांची तपासणी सुरू आहे. कुटुंबातील तिन्ही सदस्यांचे मोबाईल फोनही पोलिसांनी जप्त केले असून डिजिटल पुरावे, ऑनलाइन व्यवहार आणि इतर बाबींची चौकशी सुरू आहे.
या प्रकरणात इतर कोणाचा सहभाग होता का किंवा कुटुंबावर कोणताही बाह्य दबाव होता का, याचाही तपास संत तुकारामनगर पोलीस करत आहेत. सर्व तांत्रिक आणि फॉरेन्सिक अहवाल आल्यानंतरच या घटनेमागील नेमके कारण स्पष्ट होणार असल्याचे पोलिसांनी सांगितले आहे.
