पुणे: पिंपरी-चिंचवड शहरात (Pune News) पाणीपुरवठ्याचा तुटवडा अधिक (Pimpri-Chinchwad News) गंभीर होत चालला आहे. महापालिकेने (Pune Water Supply) जलशुद्धीकरण केंद्रातील कामासाठी एक दिवसासाठी बंद केलेला पाणीपुरवठा सात दिवस उलटूनही अद्याप सुरळीत झाला नाही. अनेक भागात कमी दाबाने आणि अपुरा पाणी येत असल्यामुळे नागरिक त्रस्त झाले आहेत. याच दरम्यान मेट्रोच्या कामासाठी एमआयडीसीची मुख्य जलवाहिनी स्थलांतरित करण्यासाठी उद्या गुरुवारी पुन्हा पाणीपुरवठा बंद ठेवण्यात येणार असल्याची माहिती एमआयडीसीच्या स्थापत्य विभागाने दिली आहे.
गुरुवारी सकाळी आठ वाजल्यापासून शुक्रवार सकाळी आठपर्यंत पाणीपुरवठा पूर्णपणे बंद राहणार आहे. याचा परिणाम पिंपरी-चिंचवड, देहूरोड, भोसरी, कासारवाडी, निगडी, सीएमई, आर अॅण्ड डी दिघी, व्हीएसएनएल या भागांवर होणार आहे. या भागातील नागरिकांनी पाणी काटकसरीने वापरावे आणि आवश्यक पाणीसाठा करून ठेवावा, असे आवाहन करण्यात आले आहे. शुक्रवारी, शनिवार आणि रविवारीही कमी दाबाने आणि अपुरा पाणी येण्याची शक्यता व्यक्त केली आहे.
शहरात नोव्हेंबर २०१९ पासून एक दिवसाआड पाणीपुरवठा सुरू आहे. हा तात्पुरता निर्णय आता सहा वर्षे कायम आहे. धरणात पुरेसा पाणी साठा असतानाही दररोज पाणीपुरवठा शक्य नसल्याचे प्रशासन सांगत आहे. त्यामुळे नागरिकांमध्ये तीव्र नाराजी असून पाणीपुरवठा सुरळीत करण्याची मागणी वाढत आहे.
