पिंपरी-चिंचवड: भोसरीतील संत ज्ञानेश्वर महाराज क्रीडा संकुलात (Pimpri-Chinchwad) सध्या पहाटेच्या कडाक्याच्या थंडीत हजारो तरुण पोलीस शिपाई पदासाठी घाम गाळतांना दिसून आले. पिंपरी-चिंचवड पोलीस आयुक्तालयांतर्गत 462 पोलीस शिपाई पदासाठी भरती प्रक्रिया घेण्यात आली. एकेकाळी केवळ 12 वी पास तरुणांचे लक्ष्य असणाऱ्या पोलीस भरतीत आता चक्क इंजिनिअर्स, एम.टेक आणि एमबीए पदवीधरांनी उडी घेतली आहे. आकडेवारीनुसार, एकूण अर्जांपैकी सुमारे 36 टक्के उमेदवार उच्चशिक्षित आहेत.
-
शिक्षणाचे गणित: 14,779 अर्जांमध्ये 156 इंजिनिअर्स, 59 MBA, 23 MCA आणि 3 चक्क M.Tech झालेले तरुण आहेत.
-
विविध शाखा: यामध्ये वकील, पत्रकार आणि हॉटेल मॅनेजमेंटचे शिक्षण घेतलेल्या तरुणांचाही समावेश आहे.
खाजगी क्षेत्रातील नोकरीची अनिश्चितता आणि सरकारी नोकरीत मिळणारी ‘सुरक्षितता’ हे यामागील प्रमुख कारण आहे. आयटी हब असलेल्या पिंपरी-चिंचवडमध्येच उच्चशिक्षित तरुणांना नोकऱ्यांसाठी संघर्ष करावा लागत असल्याचे हे जिवंत उदाहरण आहे. पदवी असूनही पाहिजे तसा पगार किंवा स्थैर्य मिळत नसल्याने, तरुण पोलीस दलातील नोकरीला प्राधान्य देत आहेत. उच्चशिक्षितांच्या या गर्दीमुळे पोलीस दलाला अधिक ‘स्मार्ट’ आणि तांत्रिकदृष्ट्या सक्षम मनुष्यबळ मिळण्याची शक्यता निर्माण झाली आहे.
