पिंपरी-चिंचवड : पिंपरी-चिंचवड पोलिसांनी एका मोठ्या दरोड्याची योजना उधळून लावत ‘रावण टोळी’च्या नऊ सदस्यांना अटक केली आहे. चिखलीतील एका ज्वेलर्सच्या दुकानावर दरोडा टाकण्याच्या या टोळीचा प्लॅन होता. मात्र, पोलिसांनी केलेल्या या कारवाईमुळे ही घटना टळली. आरोपींकडून पिस्तूल, राऊंड, कोयता, गुप्ती आणि मिरची पावडर यांसारखी घातक साहित्य जप्त करण्यात आली आहेत. जप्त केलेल्या सामानाची एकूण किंमत 15.25 लाख रुपये आहे.
पोलिसांनी कसा उधळला दरोड्यांचा षड्यंत्र?
17 सप्टेंबर 2025 रोजी सकाळी गुंडा विरोधी पथकाला गोपनीय माहिती मिळाली की, पाटीलनगर पाण्याच्या टाकीजवळ असलेल्या खदाणीत दोन पांढऱ्या रंगाच्या गाड्या उभ्या असून, त्यात 8 ते 9 संशयित शस्त्र घेऊन थांबले आहेत.
या माहितीच्या आधारे सहायक पोलीस निरीक्षक एच. व्ही. माने यांनी तात्काळ टीम तयार करून सापळा रचला. पोलिसांनी घटनास्थळी छापा टाकला असता, तिथे नऊ संशयित सापडले. त्यांना ताब्यात घेऊन चौकशी केली असता, त्यांनी चिखलीतील एका ज्वेलर्सच्या दुकानावर दरोडा टाकण्याची योजना आखल्याची कबुली दिली.
पोलिसांनी या प्रकरणात अनिरुद्ध उर्फ बाळ्या जाधव, अभिषेक हरकळे, यश खंडागळे, शुभम चव्हाण, प्रद्युम्न जवगे, सोहन चंदेलिया आणि तीन अल्पवयीन मुलांना ताब्यात घेतलं आहे.
आरोपींच्या स्वीफ्ट आणि ऑडी गाड्यांमधून दरोड्यासाठी वापरण्यात येणारे पिस्तूल, राऊंड, लोखंडी कोयता, गुप्ती, मिरची पावडर आणि दोरी जप्त करण्यात आली आहे. पोलीस उप-निरीक्षक समीर लोंढे यांनी चिखली पोलीस ठाण्यात आरोपींविरुद्ध तक्रार दाखल केली असून, पुढील तपास सुरू आहे.
पोलिस आयुक्त विनयकुमार चौबे यांच्या मार्गदर्शनाखाली ही कारवाई करण्यात आली असून, पोलिसांनी दाखवलेल्या सतर्कतेमुळे मोठा अनर्थ टळला असून, पोलिसांचे कौतुक होत आहे.
