पिंपरी-चिंचवड: पवना धरणातून शनिवारी (दि. 26 जुलै) सकाळी 9 वाजता सोडण्यात आलेल्या 7410 क्युसेकच्या जोरदार विसर्गामुळे कोथुर्णे पूल पूर्णतः पाण्याखाली गेला आहे. परिणामी कोथुर्णे, वारू आणि मळवंडी या गावांचा पवना नगरशी संपर्क तुटला असून स्थानिक नागरिकांची गैरसोय वाढली आहे.
गेल्या काही दिवसांपासून पावसाने दमदार हजेरी लावल्याने पवना धरणाचा साठा झपाट्याने वाढला आहे. परिणामी, धरण प्रशासनाने सतर्कतेचा उपाय म्हणून उच्च विसर्ग सुरू केला. या भागातील नदीकाठची गावे धोक्याच्या झोनमध्ये आल्याने प्रशासनाने सतर्कतेचा इशारा दिला आहे.
दैनंदिन व्यवहारात अडथळे
संपर्क तुटल्यामुळे दुग्धव्यावसायिक, शेतकरी आणि विद्यार्थ्यांना मोठा फटका बसला आहे. आता या गावांतील नागरिकांना शिवली–ब्राम्हणोली किंवा कडधे मार्गे पवनानगर आणि कामशेतकडे प्रवास करावा लागत आहे, ज्यामुळे वेळ आणि आर्थिक खर्च वाढत आहे.
प्रशासनाकडून सूचना आणि खबरदारी
धरणाच्या पाणलोट क्षेत्रात अजूनही पावसाचा जोर कायम असल्याने विसर्गात चढ-उतार होण्याची शक्यता आहे. त्यामुळे नागरिकांनी नदीपात्रात न जाण्याचे आणि जनावरे, पंप यंत्रणा व शेती साहित्य तात्काळ सुरक्षित स्थळी हलवण्याचे जलसंपदा विभागाकडून निर्देश देण्यात आले आहेत.
प्रशासनाने नागरिकांना अधिकृत सूचनांकडे लक्ष ठेवण्याचे आणि कोणत्याही अफवांवर विश्वास न ठेवण्याचे आवाहन केले आहे. जलसंपदा विभाग परिस्थितीवर बारकाईने लक्ष ठेवून असून संभाव्य धोका लक्षात घेता खबरदारीचे उपाय सुरू आहेत.
