पिंपरी( पुणे) : शंभरावे संमेलन दोन वर्षांपूर्वी होणे अपेक्षित होते. परंतु, कोरोनामुळे झाले नाही. कदाचित नियतीच्या मनात असेल की एकनाथ शिंदे मुख्यमंत्री झाल्यानंतरच शंभरावे संमेलन व्हावे. आणि १०० व्या संमेलनाला मला मुख्यमंत्री म्हणून उपस्थित राहता आले असे राज्याचे मुख्यमंत्री एकनाथ शिंदे म्हणाले, शंभरावव्या संमेलनाच्या उद्घाटनपर भाषणात मुख्यमंत्री एकनाथ शिंदे बोलत होते .
ऐतिहासिक शंभराव्या अखिल भारतीय मराठी नाट्य संमेलनाची चिंचवड येथील श्री मोरया गोसावी संकुल येथे घंटा वाजली. ९९ व्या नाट्य संमेलनाचे अध्यक्ष प्रेमानंद गज्वी यांच्या उपस्थितीत नटराज, घंटेचे पूजन करून संमेलनाचे उद्घाटन झाले. राष्ट्रवादी काँग्रेसचे अध्यक्ष, संमेलनाचे स्वागत अध्यक्ष शरद पवार, उद्योगमंत्री उदय सामंत, खासदार श्रीरंग बारणे, शंभराव्या संमेलनाचे अध्यक्ष डॉ.जब्बार पटेल, नाट्य परिषदेचे अध्यक्ष प्रशांत दामले, जिल्हाधिकारी डॉ.राजेश देशमुख यावेळी उपस्थित होते.
यावेळी बोलताना मुख्यमंत्री म्हणाले, दिमाखदार सोहळा आयोजित केला असून कलेच्या क्षेत्रात एखादा उपक्रम दरवर्षी १०० वर्षे करत राहणे हे सोपं काम नाही. हे केवळ मराठी माणसाच्या रंगभूमीवरील प्रेमामुळे शक्य झालं. मराठी प्रेक्षक दर्दी आणि चोकंदळ आहेत. खरे तर हे शंभरावे संमेलन दोन वर्षांपूर्वी होणे अपेक्षित होते. परंतु, करोनामुळे झाले नाही.कदाचित नियतीच्या मनात असेल की एकनाथ शिंदे मुख्यमंत्री झाल्यानंतरच शंभरावे संमेलन व्हावे. आणि १०० व्या संमेलनाला मला मुख्यमंत्री म्हणून उपस्थित राहता आले.
राजकारणात देखील काही धाडसी प्रयोग होतात. आम्ही दीड वर्षांपूर्वी असाच प्रयोग केला आहे. त्याची इतिहास नोंद होईल. अभिनेते अभिनय करतात. मनावर उपचार करणारे औषध म्हणजे नाटक आहे. नाटकाचे तिकीट काढणे म्हणजे कलावंताचे कौतुक करणे आहे. आम्ही नेते असलो तरी तुम्ही अभिनेते आहात. प्रेक्षकांसमोर तुम्हाला अभिनय करावा लागतो, असंही एकनाथ शिंदे यावेळी म्हणाले.
