पिंपरी : डंपरला ओव्हरटेक करण्याच्या प्रयत्नात भरधाव दुचाकीची रस्ता दुभाजकाला धडक बसली. यामध्ये दुचाकीस्वाराचा गंभीर जखमी होऊन मृत्यू झाल्याची घटना निघोजे (ता. खेड) गावच्या हद्दीतील महाळुंगे ते स्पायसर चौकाकडे जाणाऱ्या रस्त्यावर बजाज कंपनीजवळ घडली.
भावेश दिलीप नहिरे (वय-३०, रा. तळेकर नगर, एसपी कॉलेजच्या समोर, आळंदी) असे मृत्यू झालेल्या तरुणाचे नाव आहे. त्याच्यावर मोटार वाहन कायद्यांतर्गत गुन्हा दाखल केला आहे. याबाबत ऋषिकेश तुकाराम शिंदे (वय-२६, रा. इंद्रायणी नगर, आळंदी मूळ, रा. मु.पो. मसला, ता. गंगाखेड, जि. परभणी) याने महाळुंगे एमआयडीसी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, फिर्यादी व त्याचा मित्र मृत भावेश नहिरे हे दोघे पॅशन प्रो दुचाकीवरुन (एमएच १५ बी वाय ३३२५) जात होते. त्यावेळी भावेश दुचाकी चालवत होता. भावेश याने रात्रीच्या वेळी रस्त्याच्या परिस्थितीकडे दुर्लक्ष करुन, हयगयीने, निष्काळजीपणाने वेगात चालवत होता. समोर चाललेल्या डंपरला ओव्हरटेक करुन पुढे जाण्याचा प्रयत्न केल्यामुळे त्याचे दुचाकीवरील नियंत्रण सुटले. दुचाकी रस्त्याच्या दुभाजकाला धडकली. यात भावेश रस्त्यावर पडल्याने त्याला गंभीर दुखापत होऊन त्याचा जागीच मृत्यू झाला. तर फिर्यादी शिंदे गंभीर जखमी झाला.
