पुणे : एका अल्पवयीन मुलीसोबत इन्स्टाग्राम आणि स्नॅपचॅटवर ओळख निर्माण करून तिच्याकडे अश्लील फोटो आणि व्हिडीओची मागणी केली. एवढंच नाही तर तिचे फोटो मॉर्फ करुन तिला पाठवून स्त्री मनास लज्जा उत्पन्न होईल असे कृत्य केल्याचा धक्कादायक प्रकार उघडकीस आला आहे.
हा प्रकार फेब्रुवारी 2022 ते 7 जून 2024 या कलावधीत सोशल मीडियावर घडला आहे. याप्रकरणी एका अल्पवयीन मुलीने चतु:श्रृंगी पोलीस ठाण्यात फिर्याद दिली आहे. त्यावरून एका इमेल आयडी धारकावर गुन्हा दाखल करण्यात आला आहे.
याबाबत पोलिसांनी दिलेल्या माहितीनुसार, फिर्यादी आणि आरोपीची स्नॅपचॅट व इन्स्टाग्रामवर या सोशल मीडियाच्या माध्यमातून ओळख झाली. त्यानंतर त्या ओळखीतून ते दोघे एकमेकांना चॅटींग करुन बोलू लागले. त्याचे फोटो एकमेकांना पाठवले. त्यानंतर आरोपी मुलाने मुलीला त्रास देण्यास सुरुवात केली. त्यामुळे तिने आरोपीला ब्लॉक केले.
त्यामुळे आरोपीने वेगवेगळ्या नंबरवरुन मुलीला फोन करुन त्रास देण्यास सुरुवात केली. पिडीत मुलीचा व तिच्या घरच्यांचे मेल आयडी आणि पासवर्ड घेऊन पिडीत मुलीला तिचे न्युड फोटो व व्हिडीओ पाठवण्यास सांगितले. फोटो, व्हिडीओ पाठवले नाही, तर तुझे फोटो न्युड करुन आई-वडिलांना पाठवेन, अशी धमकी दिली. तसेच मुलीचे फोटो न्युड करुन ते पिडीत मुलीला पाठवून तिचा विनयभंग केल्याचे फिर्यादीत म्हटले आहे. पुढील तपास पोलीस करीत आहेत.
