Winter Session : नागपूरच्या दोन तोतया पत्रकारांनी पुण्यात पत्रकार असल्याचे भासवून फसवणूक केल्याचा धक्कादायक प्रकार उघडकीस आला आहे. याप्रकरणी पुणे येथील येरवडा वृत्तवाहिनीचे विनोद कुमार यमुना ओझा (वय ५४ रा. पुणे ) यांनी दिलेल्या तक्रारीवरून सदर पोलिसांनी गुन्हा दाखल केला आहे.
सविता साखरे कुलकर्णी आणि नरेंद्र वैरागडे अशी या तोतया पत्रकारांची नावे आहेत. दरम्यान ऐन अधिवेशनाच्या वेळी उघडकीस आलेल्या प्रकाराने पत्रकारिता क्षेत्रात मोठी खळबळ उडाली आहे.
पोलिसांनी दिलेल्या अधिक माहितीनुसार, हे दोघेही दिल्लीतील एका वृत्तवाहिनीचे राज्यातील प्रमुख असल्याची बतावणी करून त्यांनी अनेक कार्यक्रम आणि विधिमंडळाची पास तयार केल्याची माहिती समोर आली. याबाबत वृत्तवाहिनीला माहिती मिळताच, त्यांनी नागपुरात विचारपूस केली असता ते बनावट पास तयार करून फिरत असल्याचे त्यांना समजले.
यावेळी दोघांचीही नावे समोर आली असता, त्यांनी पुण्यात येरवडा पोलिस ठाण्यात तक्रार दाखल केली. तक्रार नागपुरातील व्यक्तीशी निगडीत असल्याने त्यांनी ती सदर पोलिस ठाण्यात वर्ग केल्यावर त्यावरून गुन्हा दाखल करण्यात आला असल्याची माहिती पोलिसांनी दिली.
