लोणी काळभोर : थेऊर-कोलवडी रस्त्यावर एका भरधाव ट्रकने दुचाकीला पाठीमागून धडक दिल्याची घटना धक्कादायक घटना घडली आहे. ही घटना थेऊर (ता. हवेली) ग्रामपंचायत हद्दीतील मुळा-मुठा नदीच्या पुलाजवळ शनिवारी (ता.६) रात्री अकरा वाजण्याच्या सुमारास घडली. या अपघातात २० वर्षीय दुचाकीस्वराचा जागीच मृत्यू झाला आहे.
अथर्व संतोष हिंद्रे (वय २०, रा. भौरोबा गल्ली, फलटण, जि. सातारा) असे मृत्यू झालेल्या दुचाकीस्वाराचे नाव आहे. मिळालेल्या माहितीनुसार अथर्व हिंद्रे हा दुचाकीवरून गावी फलटणला निघाला होता. दुचाकीवरून जात असताना, त्याची गाडी मुळा-मुठा नदीच्या पुलाजवळून थेऊर (ता. हवेली) ग्रामपंचायत हद्दीत आली. तेव्हा त्याच्या दुचाकीला पाठीमागून भरधाव वेगाने चाललेल्या ट्रकने जोरदार धडक दिली. या अपघातात अथर्व हिंद्रे हा गंभीर जखमी झाला.
या घटनेची माहिती मिळताच, लोणी काळभोर पोलीस तातडीने घटनास्थळी दाखल झाले. पोलिसांनी जखमीला लोणी काळभोर येथील एका बड्या रुग्णालयात उपचारासाठी दाखल केले. मात्र, तेथील डॉक्टरांनी उपचारापूर्वीच त्याचा मृत्यू झाल्याचे सांगितले. दरम्यान, या प्रकरणी अज्ञात चालकाच्या विरोधात लोणी काळभोर पोलीस ठाण्यात गुन्हा दाखल करण्याची प्रक्रिया सुरु आहे.
