Loni kalbhor : अनधिकृत प्लॉटिंग करून व्यावसायिकांनी जागेची विक्री केली आहे. प्लॉटिंग करताना व्यावसायिकांनी ओढे बुजवून अतिक्रमणे केली आहेत. सध्या त्या प्लॉटिंगमध्ये इमारतींची कामे चालू आहे. व्यावसायिकांनी गुंडगीरी करुन 7 गुंठे जमीनीवर ताबा ठोकला आहे. अनधिकृत बांधकामांवर कारवाई करण्यासाठी मागील चार वर्षापासून पाठपुरावा करत आहे. परंतु, प्रशासनाने अद्यापपर्यंत त्यांना अभय दिले. असे गंभीर आरोप करत महिलेने संबंधित प्लॉटिंग व्यावसायिकांवर आता तरी कारवाई करा. नाहीतर येत्या 26 जानेवारीला लोणी काळभोर अपर तहसील कार्यालयासमोर आत्मदहन करणार. असा इशाराही प्रशासनाला दिला आहे.
मनीषा राजाराम कुंजीर (रा. लोणी काळभोर) असे प्रशासनाला आत्मदहनाचा इशारा देणाऱ्या महिलेचे नाव आहे. त्यांनी याबाबत पुणे जिल्हाधिकारी, पोलीस आयुक्त, प्रांताधिकारी, लोणी काळभोर अपर तहसील कार्यालय व पोलीस ठाण्यात अर्जाद्वारे तक्रार केली आहे. कुंजीर यांनी लिहिलेल्या अर्जात असे म्हटले आहे की, शिवशक्ती बिल्डकॉन भागीदारी संस्थेचे भागीदार सुनिल मारुती हरपळे, विजय वसंत बाजारे, यश आनंत घुले, दिलीप रामदास घुले, गणेश महादेव काळभोर, महेश महादेव काळभोर, सागर बाळासाहेब ढोरे, रविंद्र मारुती बाजारे, व वैशाली प्रकाश इंदलकर या सर्व प्लॉटिंग व्यावसायिकांनी लोणी काळभोर (ता. हवेली) ग्रामपंचायत हद्दीत 5 एकर क्षेत्रामध्ये अनधिकृत प्लॉटिंग केली आहे. (Loni kalbhor)
सर्व व्यावसायिकांनी अनधिकृत प्लॉटिंग केली आहे. त्यांनी ओढ्यावरच सिमेंटचे रस्ते बांधले आहेत. त्यामुळे मनीषा कुंजीर यांचे 7 गुंठे क्षेत्र पाण्याखाली जात आहे. पी.एम.आर.डी.ए यांच्या कार्यालयातून बांधकाम परवानगी नसताना, त्या जागेवर दोन ते तीन मजली असे अनेक बांधकामे चालू आहेत. त्यामुळे नैसर्गिक स्त्रोत बुजले आहेत. याबाबत प्रशासनाकडे वारंवार अर्ज करुनही अद्यापपर्यंत दखल घेतलेली नाही.
दरम्यान, शिवशक्ती बिल्डकॉन भागीदारी संस्था यांच्या अनधिकृत कारभाराची प्रशासनाने कसून चौकशी करून कारवाई करावी. व दहा दिवसाच्या आत न्याय द्यावा. अन्यथा लोणी काळभोर येथील अपर तहसील कार्यालयासमोर 26 जानेवारीला आत्मदहन करणार असा इशारा मनीषा कुंजीर यांनी प्रशासनाला दिला आहे.
संबंधित महिलेने केलेल्या आरोपांमध्ये काडीमात्रसुद्धा तथ्य नाही. जाणूनबुजून मानसिक त्रास देण्याचे काम सुरु आहे. त्यांचे क्षेत्र 12 आर आहे. परंतु, शासनाच्या चुकीने सातबारा दप्तरी 18 आर क्षेत्र लागले आहे. याचाच फायदा घेण्याचे काम संबंधित महिला करत आहे. आमच्या जागेची शासकीय नियमाप्रमाणे मोजणी झाली असून आम्ही कोणतेही अतिक्रमण केलेले नाही. आमच्या जमिनीला शासनाकडून एन ए ची ऑर्डर मिळाली आहे. त्यामुळे त्यांच्या खोट्या आरोपांवर कोणीही विश्वास ठेवू नये.
गणेश काळभोर (संचालक – शिवशक्ती बिल्डकॉन)
